Raj Thackeray On Ravsaheb Danve : ठाकरे बंधूंच्या पत्रकार परिषदेत एकच हशा; उद्धव ठाकरेंनीही दानवेंना सुनावले
मुंबई | “ठाकरेंची ही शेवटची निवडणूक आहे आणि यानंतर त्यांच्याकडे कार्यकर्ते उरणार नाहीत,” असे भाकीत करणाऱ्या भाजप नेते रावसाहेब दानवे यांचा मनसे अध्यक्ष राज ठाकरे Raj Thackeray यांनी आपल्या खास शैलीत समाचार घेतला. “मला वाटतं, उत्तरं देवांना द्यावीत, दानवांना नाही,” असे म्हणत राज ठाकरेंनी दानवेंच्या विधानाचा एका वाक्यात कचरा केला. राज ठाकरेंच्या या हजरजबाबीपणामुळे गंभीर वातावरणातील पत्रकार परिषदेत एकच हशा पिकला.
आगामी महापालिका निवडणुकांच्या पार्श्वभूमीवर रावसाहेब दानवे यांनी उद्धव ठाकरे यांच्यावर टीका करताना म्हटले होते की, ही त्यांची शेवटची निवडणूक असेल आणि त्यानंतर कार्यकर्ते त्यांचे भविष्य पाहण्यासाठी इतरत्र निघून जातील. आजच्या संयुक्त पत्रकार परिषदेत पत्रकारांनी या विधानाबाबत उद्धव ठाकरे यांना प्रश्न विचारला.
उद्धव ठाकरेंचा प्रहार
या प्रश्नावर उत्तर देताना उद्धव ठाकरे म्हणाले, “रावसाहेब दानवे यांना उत्तर द्यायला ते त्या पातळीचे नेते नाहीत. मुळात त्यांना त्यांच्या स्वतःच्या पक्षातही आता कोणी विचारत नाहीये.” उद्धव ठाकरे दानवेंच्या टीकेचा समाचार घेत असतानाच, राज ठाकरेंनी हस्तक्षेप करत मैफिल लुटली.
राज ठाकरेंची ‘बॅटिंग’
उद्धव ठाकरे बोलत असतानाच राज ठाकरेंनी त्यांच्या हातातून माईक घेतला आणि मिश्किलपणे म्हणाले, “मला वाटतं आपण उत्तरं ‘देवांना’ दिली पाहिजेत, ‘दानवांना’ नाही!” त्यांच्या या कोपरखळीमुळे उपस्थित पत्रकारांमध्ये हशा पिकला आणि दानवेंच्या टीकेतील हवाच निघून गेली.
मुंबईचा महापौर मराठीच होणार!
याच पत्रकार परिषदेत राज ठाकरे यांनी अत्यंत आत्मविश्वासपूर्वक जाहीर केले की, आगामी महानगरपालिका निवडणुकीनंतर “मुंबईचा महापौर मराठीच होईल आणि तो आमच्या युतीचाच असेल.” महाराष्ट्राच्या हितासाठी आणि अस्मितेसाठी दोन्ही ठाकरे बंधू आता पूर्ण ताकदीने मैदानात उतरल्याचे आजच्या चित्रामुळे स्पष्ट झाले आहे.
