Thackeray News : BMC स्वीकृत नगरसेवकांसाठी ठाकरेंची ‘फिल्डिंग’; मनसेची मागणी धुडकावत ‘या’ तीन नावांवर शिक्कामोर्तब

Mumbai BMC Latest News : साईनाथ दुर्गे, माधुरी मांजरेकर आणि कैलास पाठक यांना मिळणार संधी; 28 फेब्रुवारीला होणार अधिकृत घोषणा

मुंबई | मुंबई महानगरपालिकेच्या निवडणुकीचे Mumbai BMC निकाल लागल्यानंतर आता स्वीकृत नगरसेवक (Nominated Councilors) निवडीच्या हालचालींना वेग आला आहे. शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांनी आपल्या कोट्यातील जागांसाठी तीन नावे निश्चित केल्याची खात्रीशीर माहिती समोर आली आहे. विशेष म्हणजे, मनसेकडून करण्यात आलेली एका जागेची मागणी ठाकरे गटाने फेटाळून लावली असून, आपल्याच निष्ठावंतांना संधी देण्याचा निर्णय घेतला आहे. Thackeray Latest News

ठाकरे गटाचे संख्याबळ आणि जागा

मुंबई महापालिकेच्या ताज्या आकडेवारीनुसार, एका स्वीकृत नगरसेवकासाठी साधारण 22.7 नगरसेवकांचे संख्याबळ असणे आवश्यक आहे. ठाकरेंच्या शिवसेनेकडे सध्या 65 नगरसेवक आहेत, ज्या आधारावर त्यांना 3 स्वीकृत नगरसेवक महापालिकेत पाठवता येणार आहेत. या तीन जागांसाठी खालील नावांची निश्चिती झाल्याचे समजते,

साईनाथ दुर्गे (युवासेना कोअर कमिटी सदस्य आणि सचिव)

माधुरी मांजरेकर

कैलास पाठक

मनसेच्या मागणीकडे दुर्लक्ष

महाराष्ट्र नवनिर्माण सेनेचे गटनेते यशवंत किल्लेदार यांनी ठाकरे गटाकडे त्यांच्या कोट्यातून एक जागा मनसेला देण्याची विनंती केली होती. मात्र, राज ठाकरे आणि उपमुख्यमंत्री एकनाथ शिंदे यांच्या वाढत्या जवळीकीच्या पार्श्वभूमीवर, उद्धव ठाकरे यांनी मनसेला मदत न करण्याचा पवित्रा घेतल्याचे राजकीय वर्तुळात बोलले जात आहे. परिणामी, ठाकरे गटाने आपल्या तिन्ही जागांवर स्वतःचेच उमेदवार देण्याचे ठरवले आहे.

काय असतो ‘स्वीकृत नगरसेवक’?

स्वीकृत नगरसेवक हा जनतेतून थेट निवडून न येता, विविध क्षेत्रातील अनुभवाच्या आधारावर राजकीय पक्षांकडून नियुक्त केला जातो.

निवड प्रक्रिया: महापालिका आयुक्तांच्या शिफारशीनंतर आणि सभागृहाच्या संमतीने ही नियुक्ती होते.

पात्रता: शिक्षण, आरोग्य, कायदा किंवा सामाजिक क्षेत्रातील तज्ज्ञ व्यक्तींची या पदावर वर्णी लागणे अपेक्षित असते.

अधिकार: त्यांना निवडून आलेल्या नगरसेवकांप्रमाणेच मानधन आणि विकास निधी मिळतो. ते महापालिकेच्या चर्चांमध्ये सहभागी होऊ शकतात, परंतु महापौर किंवा स्थायी समिती निवडणुकीत त्यांना मतदानाचा अधिकार नसतो.