BSE Bomb Threat : “बीएसई उडवून देणार!” – बॉम्बे स्टॉक एक्सचेंजला धमकीचा ईमेल, सुरक्षा यंत्रणा अलर्ट!
- ‘3 वाजता 4 RDX बॉम्ब स्फोटतील’ असा इशारा; परिसराची झाडाझडती, सुदैवाने कोणतीही संशयास्पद वस्तू आढळली नाही
मुंबई | देशाच्या आर्थिक शिरापासातील – बॉम्बे स्टॉक एक्सचेंज (BSE) – या महत्वाच्या संस्थेला स्फोटाने उडवून देण्याची गंभीर धमकी ईमेलद्वारे देण्यात आल्याने एकच खळबळ उडाली. ‘दुपारी 3 वाजता चार आरडीएक्स बॉम्ब स्फोटणार’ असा इशारा या ईमेलमध्ये देण्यात आला होता. ही माहिती मिळताच पोलिसांनी तत्काळ घटनास्थळी धाव घेत संपूर्ण परिसराची कसून झडती घेतली, मात्र कोणतीही संशयास्पद वस्तू आढळून आली नाही.
धमकीचा ईमेल बीएसईच्या अधिकृत वेबसाइटवरील ईमेल आयडीवर रविवारी पाठवण्यात आला होता. त्यावेळी कार्यालय बंद असल्यामुळे सकाळी सोमवारी एक अधिकाऱ्याच्या निदर्शनास ईमेल आला. ईमेलमध्ये म्हटले होते की, “फिरोज टॉवर इमारतीत ४ आरडीएक्स आयईडी बॉम्ब लावण्यात आले आहेत, आणि त्यांचा स्फोट दुपारी 3 वाजता होईल.” यानंतर त्या अधिकाऱ्याने तत्काळ मुंबई पोलिसांना संपर्क केला.
धमकीची माहिती मिळताच रमाबाई आंबेडकर मार्ग पोलिस ठाणे, तसेच बॉम्ब शोधक व नाशक पथक (BDDS), डॉग स्क्वॉड, आणि अन्य सुरक्षा यंत्रणा घटनास्थळी दाखल झाल्या. BSE च्या फिरोज टॉवरसह संपूर्ण परिसरात तपासणी करण्यात आली, मात्र तपासात कोणताही बॉम्ब अथवा संशयास्पद वस्तू आढळून आली नाही.
या प्रकरणी रमाबाई मार्ग पोलिस ठाण्यात अज्ञात व्यक्तीविरोधात गुन्हा दाखल करण्यात आला आहे. गुन्हा भारतीय न्यायसंहिता 2023 अंतर्गत कलम 351 (1)(ब), 353(2), 351(3), आणि 351(4) नुसार नोंदवण्यात आला आहे.
पोलिस धमकी पाठवणाऱ्या ईमेल आयडीचा, IP पत्ता, व लोकेशनचा तपास करत असून, सायबर युनिटच्या सहाय्याने आरोपीचा माग काढला जात आहे. पोलिसांच्या प्राथमिक अंदाजानुसार, ही खोट्या धमकीने गोंधळ निर्माण करण्याची हरकत असण्याची शक्यता आहे, परंतु सुरक्षा यंत्रणा कोणतीही शक्यता दुर्लक्ष न करता तपास करत आहेत.
