Amol Mitkari On Ladki Bhain Yojana : “योजनेचे खरे शिल्पकार दादाच”; स्मृती जपण्यासाठी मिटकरींचे भावनिक आवाहन, राजकीय वर्तुळात चर्चांना उधाण
मुंबई | राज्याचे दिवंगत उपमुख्यमंत्री आणि प्रभावी अर्थमंत्री अजित पवार Ajit Pawar यांच्या स्मृती चिरंतन जपण्यासाठी राज्यातील अत्यंत लोकप्रिय आणि महत्त्वाकांक्षी ‘लाडकी बहीण’ योजनेला “अजितदादा पवार लाडकी बहीण योजना” असे नाव देण्यात यावे, असा प्रस्ताव राष्ट्रवादी काँग्रेसचे आमदार अमोल मिटकरी यांनी मुख्यमंत्री देवेंद्र फडणवीस यांच्याकडे पाठवला आहे. या मागणीमुळे आता योजनेच्या नामकरणावरून राज्याच्या राजकारणात मोठी चर्चा सुरू झाली आहे.
योजनेसाठी दादांनी तिजोरीचे दरवाजे उघडले अमोल मिटकरी यांनी आपल्या पत्रात म्हटले आहे की, “लाडकी बहीण योजना साकारण्यामागे आणि त्याची प्रभावी अंमलबजावणी करण्यामागे अजितदादांची दूरदृष्टी होती. राज्याच्या तिजोरीवर मोठा ताण असतानाही, महिलांच्या आर्थिक सक्षमीकरणासाठी त्यांनी अर्थमंत्री म्हणून या योजनेला प्राधान्य दिले. ही योजना केवळ आर्थिक मदत नसून महिलांचा सामाजिक सन्मान आहे. त्यामुळे या योजनेला दादांचे नाव देणे हीच त्यांना खरी श्रद्धांजली ठरेल.”
श्रेयवादाच्या लढाईत नवे वळण?
‘लाडकी बहीण’ योजनेच्या श्रेयावरून महायुतीतील तिन्ही पक्षांमध्ये (भाजप, शिवसेना-शिंदे गट आणि राष्ट्रवादी-अजित पवार गट) सातत्याने चढाओढ पाहायला मिळाली आहे. आता अमोल मिटकरी यांनी थेट नामकरणाची मागणी केल्याने, मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यावर काय भूमिका घेतात, याकडे सर्वांचे लक्ष लागले आहे.
आर्थिक ताण असूनही दादा ठाम होते अजित पवार यांनी अर्थमंत्री असताना ही योजना राबवताना राज्याच्या महसुली तुटीची आणि तिजोरीवरील ताणाची जाणीव करून दिली होती. मात्र, कोणत्याही परिस्थितीत लाडक्या बहिणींचा हप्ता थांबणार नाही, याची खबरदारी त्यांनी घेतली होती. याच पार्श्वभूमीवर ही मागणी अत्यंत महत्त्वपूर्ण मानली जात आहे.
