Devendra Fadnavis On Ambernath Yuti : देवेंद्र फडणवीस प्रचंड संतापले; “ही युती अजिबात खपवून घेणार नाही, दोषींवर कठोर कारवाई करणार” – फडणवीसांचा स्वपक्षीयांनाच इशारा
मुंबई | राज्यातील नगरपरिषद निवडणुकीच्या निकालांनंतर सत्तेची समीकरणे जुळवताना भाजपने घेतलेल्या भूमिकेमुळे राजकीय वर्तुळात मोठी खळबळ उडाली आहे. अकोटमध्ये थेट ‘एमआयएम’ (MIM) आणि अंबरनाथमध्ये कट्टर प्रतिस्पर्धी ‘काँग्रेस’सोबत भाजपने युती केल्याने खळबळ उडाली आहे. या प्रकरणाची दखल खुद्द मुख्यमंत्री देवेंद्र फडणवीस यांनी घेतली असून त्यांनी स्थानिक नेत्यांविरुद्ध कारवाईचा बडगा उचलण्याचे संकेत दिले आहेत.
अकोटमध्ये ‘अकोट विकास मंच’चा प्रयोग
अकोट नगरपरिषदेत भाजपला सर्वाधिक 11 जागा मिळाल्या, मात्र बहुमताचा आकडा गाठण्यासाठी त्यांनी चक्क 5 जागा जिंकणाऱ्या ओवेसींच्या एमआयएमला सोबत घेतले आहे. याशिवाय यात शिंदे आणि ठाकरे गट, अजित पवारांची राष्ट्रवादी आणि बच्चू कडूंची प्रहार देखील सहभागी आहे. या नव्या ‘अकोट विकास मंच’ची नोंदणीही जिल्हाधिकाऱ्यांकडे करण्यात आली असून, आता सर्वच पक्षाच्या नगरसेवकांना भाजपचा ‘व्हिप’ पाळावा लागणार आहे.
अंबरनाथमध्ये शिंदेंच्या शिवसेनेलाच धक्का
अंबरनाथमध्ये तर भाजपने आपल्या मित्रपक्षालाच म्हणजे एकनाथ शिंदेंच्या शिवसेनेला सत्तेपासून दूर ठेवण्यासाठी काँग्रेसशी हातमिळवणी केली आहे. येथे भाजपच्या तेजश्री करंजुले नगराध्यक्षपदी निवडून आल्या आहेत, पण बहुमत मिळवण्यासाठी त्यांनी काँग्रेस (12 जागा) आणि अजित पवार गट (4 जागा) यांची मोट बांधली आहे. यावर शिंदे गटाचे आमदार बालाजी किणीकर यांनी “ही अभद्र युती असून भाजपने शिवसेनेचा घात केला आहे,” अशी टोकदार टीका केली आहे.
“अशी युती खपवून घेणार नाही” – फडणवीस आक्रमक
या विचित्र युतीवर देवेंद्र फडणवीस यांनी आपली नाराजी स्पष्टपणे व्यक्त केली आहे. एका मुलाखतीत बोलताना ते म्हणाले,
“काँग्रेस आणि एमआयएमसोबत कोणत्याही प्रकारची युती भाजप कधीही खपवून घेणार नाही. स्थानिक पातळीवर जरी हे घडले असले, तरी ते पूर्णपणे चुकीचे आहे. ज्या कोणी नेत्यांनी किंवा कार्यकर्त्यांनी ही युती केली आहे, त्यांच्यावर पक्षपातळीवर कठोर कारवाई केली जाईल.”
नेमके राजकीय गणित काय?
अकोट: भाजप (11) + एमआयएम (5) + इतर = सत्ता स्थापनेचा प्रयत्न.
अंबरनाथ: भाजप (16) + काँग्रेस (12) + राष्ट्रवादी-अजित पवार (4) = 32 (बहुमत 30 पेक्षा जास्त).
एकीकडे ‘काँग्रेसमुक्त भारत’ची घोषणा देणारा भाजप स्थानिक पातळीवर सत्तेसाठी काँग्रेस आणि एमआयएमसारख्या पक्षांच्या ‘शेजेवर’ गेल्याने विरोधकांनी आता भाजपच्या नीतिमत्तेवर प्रश्नचिन्ह उपस्थित केले आहे. येत्या 13 जानेवारीला होणाऱ्या उपनगराध्यक्ष निवडीत ही समीकरणे कशी टिकतात, याकडे सर्वांचे लक्ष लागले आहे.
