Mumbai Mahayuti Latest News : महायुतीची आज ‘रंगशारदा’मध्ये बैठक; 15 जागांवर उमेदवार अदलाबदलीची शक्यता
मुंबई :- मुंबई महानगरपालिकेत सत्ता मिळवण्यासाठी महायुतीने ‘मास्टर प्लॅन’ तयार केला आहे. मुंबईतील उत्तर भारतीय मतदारांचे महत्त्व लक्षात घेऊन भाजपने स्टार प्रचारकांची मोठी यादी निश्चित केली असून, यामध्ये उत्तर प्रदेशचे मुख्यमंत्री योगी आदित्यनाथ यांच्यासह लोकप्रिय कलाकार आणि नेत्यांचा समावेश आहे. विशेष म्हणजे, शिवसेनेकडून (शिंदे गट) अभिनेता गोविंदा हे देखील प्रचाराच्या मैदानात ‘ठुमका’ लावत मतदारांना आकर्षित करताना दिसणार आहेत.
भाजपची ‘स्टार’ रणनीती
मुंबईतील अनेक वॉर्डांमध्ये उत्तर भारतीय मतदारांचा प्रभाव निर्णायक आहे. ही मते आपल्याकडे वळवण्यासाठी भाजपने खालील स्टार प्रचारकांना पाचारण केले आहे.
राजकीय वजन: मुख्यमंत्री योगी आदित्यनाथ.
कला आणि संस्कृती: प्रसिद्ध लोकगायिका मैथिली ठाकूर.
भोजपुरी स्टार्स: मनोज तिवारी, दिनेश लाल यादव ‘निरहुआ’ आणि रवी किशन.
शिंदे गटाकडून ‘गोविंदा’ अस्त्र
शिवसेनेने (शिंदे गट) अलीकडेच आपली 40 स्टार प्रचारकांची यादी जाहीर केली आहे. यामध्ये अभिनेता गोविंदा यांचे नाव आघाडीवर आहे. मुंबईतील मराठी आणि हिंदी भाषिक मतदारांमध्ये गोविंदा यांची लोकप्रियता लक्षात घेऊन त्यांना प्रचारात उतरवण्यात येणार आहे.
जागावाटपाचा तिढा सुटणार? आज महत्त्वाची बैठक
मुंबई महापालिकेच्या जागावाटपावर चर्चा करण्यासाठी आज सकाळी 10 वाजता वांद्रे येथील ‘रंगशारदा’ सभागृहात महायुतीची समन्वय समितीची बैठक पार पडत आहे.विश्वसनीय सूत्रांनुसार, सुमारे 10 ते 15 जागांवर उमेदवारांची अदलाबदल किंवा पक्षांतर्गत देवाणघेवाण होऊ शकते.जिथे भाजपची ताकद जास्त आहे तिथे शिवसेनेने पाठिंबा द्यावा आणि जिथे शिवसेना प्रबळ आहे तिथे भाजपने सहकार्य करावे, यावर आज शिक्कामोर्तब होण्याची शक्यता आहे.
ठाकरे-मनसे युतीचे आव्हान
दुसरीकडे, ठाकरे बंधूंच्या (राज आणि उद्धव ठाकरे) युतीमुळे मराठी मतांचे ध्रुवीकरण होण्याची शक्यता आहे. हे आव्हान पेलण्यासाठीच महायुतीने उत्तर भारतीय आणि इतर भाषिकांची मते एकवटण्यासाठी ही तगडी स्टार प्रचारकांची फळी तयार केली आहे.
