Satyajit Patankar : सत्यजितसिंह पाटणकरांचा भाजपमध्ये प्रवेश; शरद पवार गटाला साताऱ्यात मोठा धक्का

•Satyajit Patankar In BJP शरद पवारांचे निकटवर्तीय, माजी बांधकाम मंत्र्यांचे वारसदार भाजपमध्ये; 2024 मध्ये अपक्ष म्हणून घेतली होती 90 हजारांहून अधिक मते

मुंबई :- सातारा जिल्ह्यातील पाटण विधानसभा मतदारसंघातील राष्ट्रवादी काँग्रेस (शरद पवार गट) चे प्रभावशाली नेते सत्यजितसिंह पाटणकर यांनी आज अधिकृतपणे भारतीय जनता पक्षात (भाजप) प्रवेश केला. पक्षाचे कार्यकारी अध्यक्ष रवींद्र चव्हाण यांच्या उपस्थितीत पार पडलेल्या या प्रवेश सोहळ्यामुळे पश्चिम महाराष्ट्रातील राजकारणात खळबळ माजली आहे.

शरद पवार यांचे निस्सीम समर्थक आणि माजी बांधकाम मंत्री विक्रमसिंह पाटणकर यांचे पुत्र असलेल्या सत्यजितसिंह पाटणकर यांनी 2024 मध्ये अपक्ष म्हणून निवडणुकीत उभे राहत 90,000 हून अधिक मते मिळवली होती, मात्र अल्प मतांतराने पराभव स्वीकारावा लागला होता. त्यानंतर भाजप प्रवेशाची चर्चा सुरू होती, ज्यास आता अधिकृत मोहोर लागली आहे.

कार्यकर्त्यांच्या भावना ओळखून निर्णय घेतला” — पाटणकरांचा स्पष्टवक्ता निर्णय, आगामी निवडणुकांत भाजपची ताकद वाढणार

भाजप प्रवेशाबाबत पाटणकर यांनी स्पष्ट केले की, “स्थानिक कार्यकर्त्यांशी चर्चा करून, त्यांची भावना ओळखूनच हा निर्णय घेतला आहे.” काही दिवसांपूर्वी त्यांनी मुख्यमंत्री देवेंद्र फडणवीस यांची भेट घेतली होती, ज्यामुळे चर्चेला अधिक बळकटी मिळाली होती. स्थानिक आमदार शंभूराज देसाई आणि खासदार उदयनराजे भोसले यांनी या निर्णयाचे स्वागत करत भाजपसाठी ही “ताकदीची भर” असल्याचे म्हटले आहे.