Sanjay Shirsat : पोलीसांना मोकळीक दिल्यास 24 तासांत गुन्हेगारी संपेल” – मंत्री संजय शिरसाट यांचे वक्तव्य

Sanjay Shirsat On Chatrapati Sambhaji Nagar Crime : लुटलेल्या सोने-चांदीवरून प्रशासनावर विरोधकांचा निशाणा

छत्रपती संभाजीनगर :- छत्रपती संभाजीनगरचे पालकमंत्री आणि शिवसेनेचे नेते संजय शिरसाट यांनी केलेले वक्तव्य सध्या चर्चेचा विषय ठरले आहे. त्यांनी म्हटले की, “कधी कधी गुन्ह्यांमध्ये पोलिसांची संलिप्तता असते. पण जर पोलीस पूर्णपणे ठरवतील आणि त्यांना मोकळीक दिली गेली, तर 24 तासांत समाजातून गुन्हेगारी संपवता येईल.” Sanjay Shirsat On Chatrapati Sambhaji Nagar Crime

शिरसाट हे सध्या सामाजिक न्याय मंत्रालयाचा कारभारही पाहत आहेत. त्यांनी हे विधान औरंगाबाद (पश्चिम) विधानसभा मतदारसंघात नुकत्याच घडलेल्या मोठ्या दरोड्याच्या पार्श्वभूमीवर केलं आहे. शहरातील एका व्यापाऱ्याच्या घरी चक्क 5.5 किलो सोने आणि 32 किलो चांदी लुटली गेल्याची घटना घडली होती.

शिरसाट म्हणाले, “हे डकैत परराज्यातून आलेले नसतात, पोलीसांकडे त्यांची माहिती असतेच. त्यामुळे जर पोलीस खरेच कारवाईला लागले, तर गुन्हे थांबवणे अशक्य नाही.” त्यांनी पोलिसांवर संशय व्यक्त करत विचारले की, “आत्तापर्यंत फक्त 320 ग्रॅम सोनेच परत मिळालं, उरलेलं सोने कुठे गेलं?”

दरम्यान, शिरसाट यांच्या मुलाने 67 कोटींची हॉटेल मालमत्ता खरेदी केल्यावरून विरोधकांनी सवाल उपस्थित केला आहे. शिवसेना (उद्धव बाळासाहेब ठाकरे) पक्षाचे खासदार संजय राऊत यांनी “पैसे कुठून आले?” असा थेट सवाल केला. यावर स्पष्टीकरण देताना शिरसाट म्हणाले, “75 टक्के कर्ज घेऊन ही मालमत्ता खरेदी करण्यात आली आहे. आमच्या मुलांनी व्यवसाय करू नये का?”