Thane News : “हे माझे बाप नाहीत!” – ठाण्यात ठाकरे गटाचा बॅनरबाण; राणेंच्या विधानाला सडेतोड उत्तर

•नितेश राणे यांच्या ‘बाप’ विधानावर ठाण्यात भव्य बॅनरद्वारे टीका, ठाकरे-राज ठाकरे यांचं प्रतिमा राजकारण पुन्हा चर्चेत

ठाणे | राजकारणात एक विधान केवढा वादंग निर्माण करू शकतं याचं ताजं उदाहरण ठाण्यात पाहायला मिळालं. भाजप नेते व मंत्री नितेश राणे यांनी “सगळ्यांचा बाप म्हणून भाजपचा मुख्यमंत्री बसलाय” असं वक्तव्य केल्यानंतर, ठाकरे गटाने ठाण्यात भव्य आणि आक्षेपार्ह मजकूर असलेला बॅनर झळकावला. या बॅनरवर थेट मजकूर लिहिण्यात आला – “मी तुषार दिलीप रसाळ… दिलीप पंढरीनाथ रसाळ हे माझे बाप. देवेंद्र गंगाधर फडणवीस हे माझे बाप नाहीत!”

“दोन मराठी वाघांनी एकत्र यावं” – ठाकरे गटाची अप्रत्यक्ष भावना, भाजपला अप्रत्यक्ष टोला

ठाण्यातील ‘तीन हाक नाका’ येथे हा बॅनर लावण्यात आला असून त्यावर राज ठाकरे आणि उद्धव ठाकरे यांचे संयुक्त फोटो आहेत. या दोन्ही नेत्यांना एकत्र आणण्याचा संदेशही या बॅनरमधून देण्यात आला आहे – “दोन मराठी वाघांनी एकत्र येणे ही महाराष्ट्राची इच्छा आहे.” ठाकरे गटाचे सहप्रवक्ता तुषार रसाळ यांनी हा बॅनर लावल्याचं सांगण्यात येतं.

दरम्यान, नितेश राणेंच्या वादग्रस्त विधानावर कालच्या मंत्रिमंडळ बैठकीतही चर्चा झाली. शिवसेनेच्या मंत्र्यांनी “आमचा बाप बाळासाहेब ठाकरे, तुमचा कोण?” असा थेट सवाल करत नाराजी व्यक्त केली. यावर उपमुख्यमंत्री देवेंद्र फडणवीस यांनी स्वतः पुढाकार घेत राणेंना समज दिली. “कुणाचाही ‘बाप’ काढणं योग्य नाही. राजकारणात perception अधिक महत्त्वाचं असतं,” असं त्यांनी स्पष्ट केलं.

या घडामोडींमुळे राज्यात राजकीय तापमान वाढले असून भाजप, ठाकरे गट आणि मनसे यांच्यातील संबंध पुन्हा एकदा चर्चेत आले आहेत.