Mira Road Accident News : मिरा रोडमध्ये इमारतीचा स्लॅब कोसळून 4 वर्षीय बालकाचा मृत्यू; प्रशासनाच्या दुर्लक्षावर प्रश्नचिन्ह
Mira Road Latest Accident News : नूरजहान इमारतीतील दुर्घटना, वडील गंभीर जखमी; चाळीस वर्षांची जुनी इमारत होती धोकादायक
मीरा रोड :- येथील नयानगर परिसरातील नूरजहान इमारतीमध्ये एक भीषण दुर्घटना घडली आहे. इमारतीच्या तिसऱ्या मजल्याचा स्लॅब कोसळून थेट दुसऱ्या मजल्यावर पडल्याने एका चार वर्षांच्या निष्पाप बालकाचा जागीच मृत्यू झाला. या दुर्घटनेत त्याचे वडीलही गंभीर जखमी झाले असून, त्यांच्यावर रुग्णालयात उपचार सुरू आहेत. या घटनेमुळे संपूर्ण परिसरात हळहळ व्यक्त होत असून, प्रशासनाच्या दुर्लक्षावर गंभीर प्रश्नचिन्ह निर्माण झाले आहे. Mira Road Latest Accident News
ही दुर्घटना घडलेली नूरजहान इमारत सुमारे चाळीस वर्षे जुनी असून ती आधीपासूनच जीर्ण आणि धोकादायक अवस्थेत होती. या घटनेनंतर प्रशासनाने तातडीने ही इमारत रिकामी करण्याचे आदेश दिले असले तरी, नागरिकांमध्ये याबद्दल प्रचंड संताप आहे. ‘जर इमारत धोकादायक होती, तर महानगरपालिकेने ती वेळीच रिकामी करण्याची कारवाई का केली नाही?’ असा सवाल नागरिक विचारत आहेत.
नागरिकांच्या म्हणण्यानुसार, जर प्रशासनाने योग्य वेळी लक्ष दिले असते आणि धोकादायक इमारत घोषित करून नागरिकांना सुरक्षित ठिकाणी हलवले असते, तर एका चिमुकल्याचा बळी गेला नसता. प्रशासनाच्या या दुर्लक्षामुळे एका निष्पाप जीवाचा बळी गेल्याचा आरोप केला जात आहे.
