Rail One App : मुंबई लोकल प्रवाशांना मोठा धक्का! UTS ॲप आता इतिहासजमा; तिकीट आणि पाससाठी रेल्वेने आणले नवीन ‘Rail One’ ॲप

•Mumbai Local New Update : ‘वन नेशन, वन ॲप’ अंतर्गत मोठा बदल: जुन्या पासधारकांचे काय होणार? रेल्वे प्रशासनाने दिले स्पष्टीकरण; प्रवाशांना नवीन वर्षाचे ‘डिजिटल’ गिफ्ट!

मुंबई | जीवनवाहिनी असलेल्या लोकल ट्रेनने प्रवास करणाऱ्या लाखो प्रवाशांसाठी नवीन वर्षाची सुरुवात एका मोठ्या बदलाने झाली आहे. रेल्वे प्रशासनाने डिजिटल सेवांचे एकत्रीकरण करण्यासाठी आतापर्यंत वापरात असलेले ‘UTS’ मोबाईल ॲप बंद करण्याचा निर्णय घेतला असून, त्याऐवजी ‘Rail One’ (रेल वन) हे नवीन अधिकृत ॲप लाँच केले आहे. या निर्णयामुळे आता ‘UTS’ ॲप इतिहासजमा झाले असून प्रवाशांना नवीन ॲपचा वापर करणे अनिवार्य झाले आहे.

UTS ॲप बंद, पण जुन्या पासचे काय?

अनेक प्रवाशांनी UTS ॲपवरून आधीच मासिक किंवा त्रैमासिक पास काढलेले आहेत. या प्रवाशांच्या मनात निर्माण झालेला संभ्रम रेल्वेने दूर केला आहे. रेल्वे प्रशासनाच्या स्पष्टीकरणानुसार:

जुना पास वैध राहणार: ज्या प्रवाशांनी UTS वरून आधीच पास काढले आहेत, त्यांचा पास मुदत संपत नाही (Expiry Date) तोपर्यंत वैध मानला जाईल.

टीसीला दाखवता येणार

प्रवासादरम्यान टीसीने विचारणा केल्यास जुना डिजिटल पास दाखवता येईल, तो पूर्णपणे ग्राह्य धरला जाईल.

नूतनीकरणासाठी नवीन ॲप: एकदा का जुन्या पासची मुदत संपली की, त्याचे नूतनीकरण करण्यासाठी प्रवाशांना सक्तीने Rail One ॲपच वापरावे लागणार आहे.

‘Rail One’ ॲपची वैशिष्ट्ये काय?

रेल्वेने ‘वन नेशन, वन ॲप’ या संकल्पनेनुसार हे पाऊल उचलले आहे. ‘Rail One’ ॲपमध्ये केवळ तिकीट बुकिंगच नाही, तर इतर अनेक सुविधा एकाच ठिकाणी उपलब्ध करून देण्यात आल्या आहेत.

1.लाईव्ह स्टेटस: लोकल ट्रेनचे रिअल टाइम लोकेशन.

2.प्लॅटफॉर्म क्रमांक: गाडी कोणत्या प्लॅटफॉर्मवर येणार याची आगाऊ माहिती.

3.आर-वॉलेट (R-Wallet): तिकीट काढण्यासाठी डिजिटल पेमेंटची सोय.

4.पास सुविधा: मासिक, त्रैमासिक आणि सहामाही पास काढण्याची विशेष सोय.