Pune Rape Accused : “पुण्यातील गँगरेप प्रकरणातील फरार नराधम जेरबंद!”; नायगाव पोलिसांनी कामशेतमधून आवळल्या मुसक्या

Naygaon Police Arrested Rape Accused From Pune : नोकरीचे आमिष दाखवून विवाहितेवर अत्याचार; मोबाईल आणि दागिनेही लुटले; वर्षभर पोलिसांना चकवा देणारा आरोपी अखेर अटकेत

नायगाव | नोकरीच्या शोधात असलेल्या एका महिलेला गाठून तिच्यावर सामूहिक बलात्कार (गँगरेप) करणाऱ्या आणि लुटमार करणाऱ्या टोळीतील शेवटचा फरार आरोपी नागेश गायकवाड याला अटक करण्यात नायगाव पोलिसांना यश आले आहे. गेल्या एक वर्षापासून आपले अस्तित्व लपवून वावरणाऱ्या या आरोपीला पोलिसांनी पुणे जिल्ह्यातील कामशेत येथून ताब्यात घेतले. या कारवाईमुळे या खळबळजनक गुन्ह्यातील सर्व आरोपी आता गजाआड झाले आहेत. Naygaon Police Latest News

असे घडले होते संतापजनक कृत्य

ही घटना 27 नोव्हेंबर 2024 रोजी घडली होती. पीडित महिला पुण्यात नोकरीच्या मुलाखतीसाठी आली असता तिला उशीर झाला. याचा फायदा घेत तिच्या पतीचा मित्र पवन सब्बत याने तिला मदतीचे आणि नोकरीचे आमिष दाखवले. तो पीडितेस मीरा रोड येथील एका खोलीत घेऊन आला. तिथे पवन सब्बत आणि त्याच्या दोन साथीदारांनी (धनराज चव्हाण आणि अभिषेक पुजारी) पीडितेवर सलग अनेक दिवस अत्याचार केले. याच काळात चौथा आरोपी नागेश गायकवाड याने पीडितेची छेडछाड केली.

लुटीसह बदनामीचाही कट

नराधमांनी केवळ अत्याचारच केला नाही, तर पीडितेचा मोबाईल, मंगळसूत्र, कानातील रिंग आणि रोख 15 हजार रुपये असा एकूण 75 हजार रुपयांचा मुद्देमालही जबरदस्तीने लुटला. इतकेच नव्हे तर मुख्य आरोपी पवन याने पीडितेच्या नावाने इन्स्टाग्रामवर बनावट आयडी बनवून तिचे फोटो अपलोड करून तिची सामाजिक बदनामी करण्याचाही प्रयत्न केला होता.

तपास आणि अटकेची कारवाई

याप्रकरणी नायगाव पोलीस ठाण्यात भारतीय न्याय संहिता (BNS) आणि माहिती तंत्रज्ञान अधिनियमाच्या (IT Act) विविध कलमान्वये गुन्हा दाखल करण्यात आला होता. पोलिसांनी यापूर्वीच तीन आरोपींना अटक केली होती, मात्र नागेश गायकवाड फरार होता. वरिष्ठ पोलीस निरीक्षक संजय हजारे यांच्या सूचनेनुसार गुन्हे प्रकटीकरण पथकाने तांत्रिक तपास आणि गुप्त माहितीच्या आधारे नागेशचा शोध सुरू केला. तो कामशेत, पुणे येथे असल्याची खात्री पटताच पोलिसांनी तिथे धाड टाकून त्याला बेड्या ठोकल्या. चौकशीदरम्यान त्याने गुन्ह्याची कबुली दिली आहे.

पोलीस आयुक्त निकेत कौशिक आणि अपर पोलीस आयुक्त दत्तात्रय शिंदे यांच्या मार्गदर्शनाखाली नायगाव पोलिसांनी ही उल्लेखनीय कामगिरी केली आहे. पीडितेला न्याय देण्याच्या दिशेने हे महत्त्वाचे पाऊल मानले जात आहे.