Pune Rain Update : राज्यात पावसाचा जोर ओसरणार: मुसळधार सरी थांबणार!

•पुणे, रायगड, रत्नागिरी, सातारा, कोल्हापूर घाट परिसरात आजही ऑरेंज/येलो अलर्ट

पुणे: मागील आठवड्यात संपूर्ण राज्यात धुमाकूळ घालणाऱ्या पावसाचा जोर आजपासून (सोमवार, 28 जुलै 2025) ओसरणार आहे. मागील काही दिवसांत अनेक भागांमध्ये मुसळधार पावसाने पूरस्थिती निर्माण केली होती, मात्र आता नागरिकांना दिलासा मिळणार आहे. हवामान विभागाने दिलेल्या माहितीनुसार, आजपासून राज्यात पावसाचा जोर कमी होईल. काही ठिकाणी अधूनमधून हलक्या सरी कोसळतील, परंतु मुसळधार पावसाची शक्यता कमी आहे.

रविवारपर्यंत कोकणासह विदर्भात सर्वाधिक पाऊस झाला, तर मुंबईतही चांगला पाऊस नोंदवला गेला. मात्र, आता पावसाची तीव्रता घटणार असून, केवळ तुरळक ठिकाणी हलक्या सरी अपेक्षित आहेत.

राज्यासाठी एक आनंदाची बातमी म्हणजे, मराठवाड्यात या हंगामात पहिल्यांदाच सामान्य पावसाची स्थिती नोंदवली गेली आहे. गेल्या आठवड्यात या विभागात चांगला पाऊस झाल्याने शेतीसाठी ही एक सकारात्मक बाब आहे. 27 जुलैपर्यंत मराठवाड्यात 242.8 मिमी पावसाची नोंद झाली आहे, तर 1 जून ते 27 जुलै या कालावधीत येथे 280.7 मिमी पाऊस अपेक्षित असतो. यासह, राज्यातील सर्व चारही उपविभागांमध्ये पावसाची सामान्य स्थिती दिसून येत आहे.

आजचा पावसाचा अंदाज:

अति मुसळधार पाऊस (ऑरेंज अलर्ट): पुणे घाट परिसर.

मुसळधार पाऊस (येलो अलर्ट): रायगड, रत्नागिरी, सातारा घाट परिसर, कोल्हापूर घाट परिसर.

इतर भागांत हलक्या सरींची शक्यता आहे.

मुंबईत आज आणि उद्या अधूनमधून हलक्या सरी बरसतील. मात्र, मागील काही दिवसांत झालेल्या पावसासारखा जोरदार पाऊस अपेक्षित नाही. बुधवारपासून मुंबईत पावसाचे प्रमाण आणखी कमी होईल.