Pune Police News : गांजा विक्रीसाठी आलेल्या उत्तर प्रदेशातील दोघांना बाणेर पोलिसांनी अटक

Pune Banner Police Arrested Ganja Seller : साडेतीन किलो गांजा जप्त, तपास सुरू; गुन्हे शाखेची मोठी कारवाई

पुणे: पुणे शहर पोलिसांच्या अंमली पदार्थ विरोधी मोहिमेला मोठे यश मिळाले आहे. गांजा विक्रीसाठी आलेल्या उत्तर प्रदेशातील दोन तरुणांना बाणेर पोलिसांनी अटक केली असून, त्यांच्याकडून तब्बल 3 किलो 400 ग्रॅम गांजा जप्त करण्यात आला आहे.

रवी विजय वर्मा (वय 19) आणि कौशलेंद्र नथुराम वर्मा (वय 23, दोघे रा. पिंपळे सौदागर, मूळ रा. चित्रकुट, उत्तर प्रदेश) अशी अटक केलेल्या आरोपींची नावे आहेत.

याबाबत मिळालेली अधिक माहिती अशी की, हे दोघे बाणेर परिसरात गांजा विक्री करण्यासाठी येणार असल्याची गुप्त माहिती पोलिसांना मिळाली होती. या माहितीच्या आधारे पोलिसांनी परिसरात सापळा रचला आणि दोन्ही आरोपींना ताब्यात घेतले. त्यांची झडती घेतली असता त्यांच्याकडे 3 किलो 400 ग्रॅम गांजा आढळून आला.

याप्रकरणी दोघांविरुद्ध अंमली पदार्थ प्रतिबंधक कायद्यान्वये गुन्हा दाखल करण्यात आला आहे. त्यांनी हा गांजा कोठून आणला आणि ते कोणाला विक्री करणार होते, याचा तपास पोलीस करत आहेत. या कारवाईमुळे पुणे शहरात अंमली पदार्थांचे जाळे पसरू पाहणाऱ्यांना मोठा धक्का बसला आहे.

ही कामगिरी परिमंडळ चारचे पोलीस उपायुक्त सोमय मुंढे आणि सहायक आयुक्त विठ्ठल दबडे यांच्या मार्गदर्शनाखाली बाणेर पोलीस ठाण्याचे वरिष्ठ पोलीस निरीक्षक चंद्रशेखर सावंत, गुन्हे शाखेच्या निरीक्षक अलका सरग आणि त्यांच्या पथकाने केली आहे. या पथकात सहायक निरीक्षक डाबेराव, नंदकुमार कदम, अनिल माने, उपनिरीक्षक संदेश माने, शैला पाथरे, सहायक फौजदार सपकाळ, गायकवाड, शिंगे, इंगळे, गाडेकर, खरात, राऊत, भोरे आणि काळे यांचा समावेश होता.