PM Narendra Modi : पंतप्रधान नरेंद्र मोदींच्या 75 व्या वाढदिवसानिमित्त राहुल गांधींसह अनेक दिग्गजांकडून शुभेच्छा

• राजकीय मतभेद कायम असतानाही शिष्टाचाराचे पालन; काँग्रेस अध्यक्ष खर्गे यांनीही दिल्या शुभेच्छा ; राष्ट्रपती द्रौपदी मुर्मू यांनी केले मोदींच्या नेतृत्वाचे कौतुक; भाजपकडून ‘सेवा पंधरवड्या’चे आयोजन

ANI :- पंतप्रधान नरेंद्र मोदी यांच्या 75व्या वाढदिवसानिमित्त देशभरात विविध कार्यक्रमांचे आयोजन करण्यात आले आहे. या सोहळ्याच्या पार्श्वभूमीवर काँग्रेसचे ज्येष्ठ नेते आणि लोकसभेतील विरोधी पक्षनेते राहुल गांधी यांनीही मोदींना वाढदिवसाच्या शुभेच्छा दिल्या आहेत. “पंतप्रधान नरेंद्र मोदीजी यांना वाढदिवसाच्या हार्दिक शुभेच्छा. त्यांच्या चांगल्या आरोग्यासाठी मी प्रार्थना करतो,” असे ट्विट राहुल गांधींनी केले आहे. यासोबतच, काँग्रेस अध्यक्ष मल्लिकार्जुन खर्गे यांनीही मोदींना शुभेच्छा देत त्यांच्या दीर्घायुष्याची कामना केली आहे.

राहुल गांधी हे पंतप्रधान मोदींच्या धोरणांचे आणि भाजपच्या विचारधारेचे प्रमुख टीकाकार मानले जातात. राहुल गांधी सरकारला अनेकदा आर्थिक आणि सामाजिक मुद्द्यांवरून प्रश्न विचारतात, तर मोदी अनेकदा त्यांच्या टीकेला थेट उत्तर देणे टाळतात. मात्र, अशा औपचारिक प्रसंगांवर दोन्ही नेते एकमेकांबद्दल राजकीय शिष्टाचार पाळताना दिसतात. हे भारतीय राजकारणात वैचारिक मतभेद आणि लोकशाही परंपरांचा संगम दर्शवते.

दरम्यान, राष्ट्रपती द्रौपदी मुर्मू यांनीही पंतप्रधान मोदींचे अभिनंदन केले असून, त्यांच्या नेतृत्व क्षमतेची प्रशंसा केली आहे. “तुमच्या असाधारण नेतृत्वाने देशात मोठी उद्दिष्ट्ये ठरवण्याची आणि ती साध्य करण्याची संस्कृती वाढवली आहे. आज जागतिक समुदायही तुमच्या मार्गदर्शनावर विश्वास ठेवत आहे,” असे राष्ट्रपती म्हणाल्या.

उपराष्ट्रपती सी.पी. राधाकृष्णन यांनीही मोदींचे कौतुक करत म्हटले की, त्यांच्या दूरदर्शी नेतृत्वाखाली भारत जागतिक मंचावर आपली मजबूत ओळख निर्माण करत आहे. लोकसभा अध्यक्ष ओम बिर्ला यांनी, “देशाप्रती असलेले पंतप्रधानांचे समर्पण प्रत्येक भारतीयासाठी प्रेरणादायी आहे,” असे सांगितले. पंतप्रधान मोदींच्या वाढदिवसानिमित्त भाजपने देशभरात 17 सप्टेंबर ते 2 ऑक्टोबरपर्यंत ‘सेवा पंधरवाडा’ सुरू केला आहे. यादरम्यान विविध कल्याणकारी आणि विकास कार्यक्रमांचे आयोजन केले जाणार आहे.