Nilesh Rane : महायुतीत ‘भावां’मध्येच तणाव! नितेश राणेंच्या वक्तव्यावर निलेश राणेंचा जळजळीत टोला
Nilesh Rane VS Nitesh Rane : महायुतीत फडणवीस समर्थक वक्तव्यानंतर शिवसेना आमदारांचा असंतोष उफाळला
मुंबई :- राज्यातील महायुतीतून एकसंधतेचे चित्र दाखवले जात असले तरी अंतर्गत कुरबुरी पुन्हा एकदा समोर येत आहेत. यावेळी वादाच्या केंद्रस्थानी आहेत खुद्द सत्ताधारी पक्षांचे दोन बंधू – मंत्री नितेश राणे आणि आमदार निलेश राणे. Nilesh Rane VS Nitesh Rane
नितेश राणे यांनी नुकतेच भाजपच्या वतीने एक ठाम विधान करत म्हटले की, “राज्यातील खरे मुख्यमंत्री देवेंद्र फडणवीसच आहेत. हे सर्वांनी लक्षात ठेवायला हवे.” या वक्तव्यानंतर त्यांच्या मोठ्या भावाने – शिवसेना आमदार निलेश राणे यांनी थेट सोशल मीडियावरुन प्रत्युत्तर देत आपला रोष व्यक्त केला.
“नितेशने बोलताना विचार करावा. आपण एकत्र बसलो तेव्हा मी काही बोललो नाही, पण प्रत्येक वाक्य कुणाच्या फायद्याचे होईल हे लक्षात घेऊनच बोलले पाहिजे,” असा सज्जड इशारा निलेश राणेंनी दिला.
या दोघांमधील हा ‘भाऊ-भाऊ’ संवाद म्हणजे महायुतीतील आंतरिक ताणतणावाचं लक्षण मानलं जात आहे. स्थानिक स्वराज्य संस्थांच्या निवडणुकांची चाहूल लागत असतानाच, सत्ताधाऱ्यांमध्येच अशी उघड वादावादी होणे, भाजप व शिंदे गटाच्या नात्यांवर प्रश्नचिन्ह निर्माण करत आहे.
