Nilesh Rane : निवडणुकीच्या तोंडावर मालवणमध्ये ‘स्टिंग ऑपरेशन’चा धमाका!

•भाजपच्या नगराध्यक्षपदाच्या उमेदवारावर ‘बनावट जात प्रमाणपत्रा’चा आरोप, निलेश राणेंकडून पुरावे सादर

सिंधुदुर्ग :- मालवण नगरपरिषद निवडणुकीच्या रणधुमाळीत वातावरण चांगलंच तापलं आहे. भाजप (BJP), शिंदे सेना (Shinde Sena) आणि ठाकरे सेना (Thackeray Sena) यांच्यात मोठी चुरस असताना, या निवडणुकीत माजी आमदार निलेश राणे (Nilesh Rane) यांनी ‘स्टिंग ऑपरेशन’ करत राजकीय भूकंप घडवला आहे.

निलेश राणे यांनी पत्रकार परिषद घेऊन भाजपच्या नगराध्यक्षपदाच्या उमेदवार शिल्पा खोत (Shilpa Khot) यांच्यावर खळबळजनक आरोप केला आहे. खोत यांचे जात प्रमाणपत्र खोटे असल्याचा दावा राणे यांनी केला असून, या आरोपाच्या पुष्टीसाठी त्यांनी काही पुरावेही (Evidence) सादर केले आहेत. राणे यांच्या या ‘स्टिंग’मुळे मालवणच्या राजकारणात मोठा ट्विस्ट आला आहे.

राणे यांनी यावेळी नमूद केले की, शिल्पा खोत यांनी जनतेची दिशाभूल केली आहे आणि त्याबद्दल त्यांनी माफी मागावी. खोत या समाजसेविका असल्याचा दावा करत असल्या तरी, या प्रकरणाने त्यांच्या उमेदवारीवर आणि प्रतिमेवर प्रश्नचिन्ह उभे राहिले आहे.विशेष म्हणजे, आरोप करताना राणे यांनी भाजपच्या कोणत्याही मोठ्या नेत्यावर किंवा पदाधिकाऱ्यावर टीका करण्याचे टाळले. मात्र, निवडणुकीच्या ऐन तोंडावर झालेल्या या गौप्यस्फोटामुळे मालवणमधील राजकीय समीकरणे बदलण्याची शक्यता आहे.