Mumbai Election News : 21 डिसेंबरला राज्यातील 288 नगरपरिषदांचा निकाल; 20 डिसेंबरला उर्वरित 39 ठिकाणी मतदान
मुंबई | राज्यातील 288 नगरपरिषदा आणि नगरपंचायतींच्या सार्वत्रिक निवडणुकांची मतमोजणी 21 डिसेंबर रोजी पार पडणार आहे. या प्रक्रियेत कोणीही अडथळा निर्माण करण्याचा प्रयत्न केला किंवा काही अनुचित प्रकार घडला, तर संबंधितांवर कठोर कायदेशीर कारवाई करण्याचे आदेश राज्य निवडणूक आयुक्त दिनेश वाघमारे यांनी दिले आहेत. मतमोजणीच्या तयारीचा आढावा घेण्यासाठी आयोजित वरिष्ठ अधिकाऱ्यांच्या बैठकीत ते बोलत होते.
निवडणूक आयोगाचा ‘ॲक्शन प्लॅन’ निवडणूक आयुक्तांनी बुधवारी सर्व जिल्हाधिकारी, पोलीस आयुक्त, पोलीस अधीक्षक आणि निवडणूक निर्णय अधिकाऱ्यांशी दूरचित्र संवादाद्वारे (Video Conferencing) संवाद साधला. यावेळी आयोगाचे सचिव सुरेश काकाणी आणि पोलीस महानिरीक्षक मनोजकुमार शर्मा उपस्थित होते.
पारदर्शकता: “कारवाई केवळ केली जाऊ नये, तर ती प्रसारमाध्यमांतून लोकांपर्यंत पोहोचवावी, जेणेकरून अफवा पसरणार नाहीत आणि यंत्रणेचा धाक राहील,” असे वाघमारे यांनी स्पष्ट केले.
समन्वय: मतदान आणि मतमोजणीच्या वेळी पोलीस आणि महसूल यंत्रणेत चोख समन्वय असणे आवश्यक असल्याचे त्यांनी सांगितले.
निवडणुकीचे महत्त्वाचे टप्पे
प्रथम टप्पा: 264 नगरपालिका आणि नगरपंचायतींसाठी 2 डिसेंबर रोजी मतदान पार पडले आहे.
दुसरा टप्पा: उर्वरित 24 नगरपालिका आणि 154 सदस्यांसाठी 20 डिसेंबर रोजी मतदान होणार आहे.
निकाल: सर्व 288 ठिकाणची मतमोजणी 21 डिसेंबर रोजी सकाळी सुरू होईल.
प्रचारावर निर्बंध आणि कायदा-सुव्यवस्था आयोगाचे सचिव सुरेश काकाणी यांनी 19 डिसेंबर रोजी रात्री 10 वाजल्यापासून इलेक्ट्रॉनिक किंवा मुद्रित माध्यमांतून कोणत्याही प्रकारची जाहिरात प्रसिद्ध करण्यास मनाई केली आहे. तसेच, मतदान आणि मतमोजणीच्या दिवशी कायदा व सुव्यवस्था राखण्यासाठी मोठा पोलीस बंदोबस्त तैनात करण्यात आला आहे.
पोलीस महानिरीक्षक मनोजकुमार शर्मा यांनी सूचना दिली की, एखादी घटना घडल्यानंतर त्यावर काय कारवाई झाली, हे तातडीने स्पष्ट करावे. कारवाईची माहिती लोकांपर्यंत न पोहोचल्यास कायदा-सुव्यवस्थेचे चित्र बिघडते, त्यामुळे माहिती अधिकृतपणे जाहीर करणे आवश्यक आहे.
