Mumbai Water Supply : मेट्रो प्रकल्पामुळे अंधेरी व विलेपार्ले पूर्व परिसरात पाणीपुरवठा विस्कळीत

•वेरावली जलाशयाजवळ खोदकामामुळे अनेक भाग प्रभावित

मुंबई | मुंबईतल्या मेट्रो-7 अ प्रकल्पाच्या कामांमुळे अंधेरी (पूर्व) आणि विलेपार्ले (पूर्व) परिसरातील नागरिकांना 22 ते 28 जून दरम्यान कमी दाबाने पाणीपुरवठा होणार आहे. मुंबई महानगर प्रदेश विकास प्राधिकरण (MMRDA) यांच्यातर्फे वेरावली जलाशयाखाली असलेल्या 1800 मिमी व्यासाच्या महत्त्वाच्या पाईपलाइनखाली बोगदा खोदण्याचे काम करण्यात येणार आहे.

22 ते 28 जूनदरम्यान कमी दाबाने पाणी येणार.. हे खोदकाम 22 जूनपासून दररोज सकाळी 7.30 ते दुपारी 3.30 आणि रात्री 9.30 ते पहाटे 3.30 या वेळेत सुरू राहणार आहे. त्यामुळे के पूर्व विभागात पाणीपुरवठ्याचा दाब कमी होणार असून नागरिकांना वेळापत्रकानुसार पाणी साठवण्याचे आवाहन महापालिकेकडून करण्यात आले आहे.

कोणत्या भागांवर होणार परिणाम?

विलेपार्ले (पूर्व): सायंकाळी 5 ते रात्री 8 या वेळेत पाणीपुरवठा कमी दाबाने होईल.

अंधेरी (पूर्व): जुना नागरदास रोड, नवीन नागरदास रोड, मोगरापाडा, अंधेरी-कुर्ला मार्ग या भागांमध्ये रात्री 8 ते 9.30 या वेळेत पाणीपुरवठा प्रभावित होणार आहे.

MMRDA व BMC प्रशासनाने नागरिकांना पाणी साठवून ठेवण्याचे व गरजेपुरतेच पाणी वापरण्याचे आवाहन केले आहे. या काळात कोणत्याही तक्रारींसाठी स्थानिक जल पुरवठा कार्यालयाशी संपर्क साधण्याची सूचना देण्यात आली आहे.