Mumbai Traffic Update : महापरिनिर्वाण दिनी मुंबईत ‘रस्ता रोको’! – चुनाभट्टी-सायन परिसरात आंबेडकर अनुयायांनी अडवला रस्ता, प्रचंड वाहतूक कोंडी

Mumbai Latest Traffic Update : रिक्षांना चैत्यभूमीच्या दिशेने जाण्यास मज्जाव केल्याने आंदोलन; पूर्व द्रुतगती महामार्गावर वाहनांच्या लांबच लांब रांगा; एका पोलीस कर्मचाऱ्याच्या पायावरून गेली गाडी, परिसरात तणाव

मुंबई :- भारतीय संविधानाचे शिल्पकार डॉ. बाबासाहेब आंबेडकर यांच्या महापरिनिर्वाण दिनानिमित्त Mahaparinirvan Divas मुंबईत दाखल झालेल्या लाखो अनुयायांपैकी काही अनुयायांनी आज (6 डिसेंबर) दुपारी चुनाभट्टी-सायन परिसरात रस्ता रोको आंदोलन केल्यामुळे मोठी वाहतूक कोंडी निर्माण झाली आहे. Mumbai Traffic Update

काय आहे नेमका वाद?

महाराष्ट्राच्या कानाकोपऱ्यातून आणि मुंबईलगतच्या शहरांमधून मोठ्या संख्येने अनुयायी चैत्यभूमीकडे मार्गस्थ होत आहेत. चुनाभट्टीजवळ पोलिसांनी रिक्षांना दादरच्या दिशेने (चैत्यभूमीकडे) पुढे जाण्यास मज्जाव केला. वाहतूक कोंडी होऊ नये म्हणून किंवा नियोजनानुसार पोलिसांनी हा निर्णय घेतला.

मात्र, रिक्षातून आलेल्या आंबेडकर अनुयायांची मागणी आहे की, रिक्षांनाही पुढे जाण्याची परवानगी द्यावी. याच मागणीसाठी संतप्त झालेल्या अनुयायांनी, ज्यात महिलांचाही समावेश आहे, त्यांनी चुनाभट्टी-सायन कनेक्टरजवळ रस्ता रोखून धरला.

परिणाम आणि तणाव

गेल्या दोन तासांपासून रस्ता रोखून धरल्यामुळे मुंबईच्या पूर्व द्रुतगती महामार्गावर दादरकडे जाणाऱ्या मार्गावर प्रचंड वाहतूक कोंडी बघायला मिळत आहे. वाहनांच्या लांबच लांब रांगा लागल्या आहेत.
परिसरात वातावरण काहीसं तापलं असून, पोलीस अनुयायांची समजूत काढण्याचा प्रयत्न करत आहेत.
या तणावाच्या दरम्यान, एक गाडी एका पोलीस कर्मचाऱ्याच्या पायावरून गेल्याची माहिती समोर आली आहे, ज्यात संबंधित पोलीस कर्मचारी जखमी झाले आहेत.
डॉ. बाबासाहेब आंबेडकर यांच्यावरील अलोट श्रद्धेमुळे आलेल्या अनुयायांना चैत्यभूमीवर लवकर पोहोचायचे असल्याने रिक्षांना पुढे सोडण्याची त्यांची मागणी आहे, तर पोलिसांनी वाहतूक व्यवस्थापनासाठी हा निर्णय घेतला असल्याचे सांगण्यात येत आहे.