Mumbai Rain Update : मुंबई, ठाणे, पुणे, रायगड, रत्नागिरीमध्ये मध्यम ते जोरदार पावसाची शक्यता; वसई-विरारमध्ये सलग चौथ्या दिवशी पाऊस, अनेक भाग पाण्याखाली; मरीन ड्राईव्हवर उंच लाटा,नागरिकांनी सतर्क राहावे
मुंबई :- गेल्या तीन दिवसांपासून सुरू असलेल्या मुसळधार पावसामुळे मुंबईसह राज्यातील अनेक जिल्ह्यांमधील जनजीवन विस्कळीत झाले होते. आज, बुधवारपासून मुंबईत पावसाचा जोर काहीसा कमी झाला असला तरी, पुढील काही तासांत पुन्हा जोरदार पावसाची शक्यता हवामान विभागाने वर्तवली आहे. Mumbai Latest Rain Update
पुढील तीन तासांत पावसाचा जोर वाढणार
हवामान विभागाने दिलेल्या अंदाजानुसार, पुढील तीन तासांत मुंबई शहर, मुंबई उपनगर, पुणे, रायगड, रत्नागिरी आणि ठाणे जिल्ह्यांमध्ये काही ठिकाणी मध्यम ते जोरदार पाऊस पडण्याची शक्यता आहे. त्यामुळे नागरिकांना सतर्क राहण्याचे आवाहन प्रशासनाने केले आहे.
मुंबईत वाहतूक सुरळीत, पण ढगाळ वातावरण कायम
आज पहाटेपासून मुंबईत पावसाचा जोर कमी झाल्याने रस्त्यांवरील वाहतूक सुरळीत झाली आहे. कालच्या मुसळधार पावसामुळे ठिकठिकाणी पाणी साचले होते, ज्यामुळे वाहतूक कोंडी झाली होती. मात्र, आजही मुंबईत ढगाळ वातावरण कायम असून, कधीही जोरदार पाऊस सुरू होऊ शकतो, अशी शक्यता वर्तवण्यात आली आहे.
वसई-विरारमध्ये पूरस्थिती कायम
मुंबईच्या जवळ असलेल्या वसई-विरार परिसरात सलग चौथ्या दिवशीही पाऊस सुरूच आहे. शहरातील मुख्य रस्ते आणि अनेक सोसायट्या गुडघाभर पाण्याखाली गेल्या आहेत. यामुळे नागरिकांची मोठी गैरसोय होत असून, पाण्यात अडकलेल्या लोकांना जीवनदानी मंदिर ट्रस्टकडून जेवण वाटप करण्यात आले आहे.
समुद्रापासून दूर राहण्याचे आवाहन
मुंबईच्या मरीन ड्राईव्ह परिसरात समुद्राला मोठ्या लाटा येत आहेत. समुद्रातील पाण्याची पातळी वाढल्याने परिसरात शुकशुकाट आहे. प्रशासनाने नागरिकांना समुद्रकिनाऱ्यापासून दूर राहण्याचे आवाहन केले आहे. या पावसामुळे राज्यातील अनेक धरणक्षेत्रातील पाणीसाठ्यात वाढ झाली आहे, ज्यामुळे पुढील काळात पाण्याची चिंता मिटली आहे.
