Mumbai Local Train Latest Timetable : अग्निरोधक यंत्रणा अचानक सक्रिय झाल्याने गाड्या जागेवरच थांबल्या; मुंबईकडे ये-जा करणाऱ्या मार्गावर प्रचंड कोंडी, तातडीने दुरुस्तीचे काम सुरू
मुंबई :- मध्य रेल्वेच्या Central Railway अत्यंत महत्त्वाच्या असलेल्या मुंबई-कर्जत उपनगरीय मार्गावर आज सकाळी (बुधवार, 10डिसेंबर) ऐन कामाच्या वेळेत मोठा तांत्रिक बिघाड झाल्याने प्रवाशांचे प्रचंड हाल होत आहेत. वांगणी आणि बदलापूर या दोन स्थानकांदरम्यान रेल्वे वाहतूक पूर्णपणे ठप्प झाली आहे, ज्यामुळे हजारो चाकरमान्यांना मोठा मनस्ताप सहन करावा लागत आहे. Mumbai Train Latest News
तांत्रिक बिघाडाचे कारण
मिळालेल्या माहितीनुसार, मुंबईकडून कर्जतकडे जाणाऱ्या डाऊन मार्गावर आधुनिक रेल्वे ट्रॅकमध्ये बसवलेली अग्निरोधक यंत्रणा (Fire Protection System) अचानक सक्रिय झाली. रेल्वे सुरक्षा प्रोटोकॉलनुसार, ही यंत्रणा कार्यान्वित झाल्यास संभाव्य धोका टाळण्यासाठी त्या मार्गावरील लोकल, मेल आणि एक्सप्रेस गाड्यांची ऑटोमॅटिक ब्रेक सिस्टीम आपोआप सक्रिय होते आणि गाड्या जागेवर थांबतात. याच कारणामुळे डाऊन मार्गावरील गाड्या पूर्णपणे थांबल्या आहेत.
वाहतुकीवर परिणाम
सकाळच्या अत्यंत गर्दीच्या वेळी हा खोळंबा झाल्यामुळे बदलापूरहून कर्जतच्या दिशेने जाणाऱ्या तसेच कर्जतहून सीएसटीकडे येणाऱ्या मार्गावरील लोकल गाड्या ट्रॅकवरच रखडल्या आहेत. यामुळे या गाड्यांमधील प्रवाशांना बराच वेळ थांबून राहावे लागत आहे. डाऊन मार्गावरील मेल आणि एक्सप्रेस गाड्यांवरही याचा थेट परिणाम झाला आहे.
डाऊन मार्गावर मोठी कोंडी आणि गाड्या अडकल्यामुळे, रेल्वे प्रशासनाला वाहतूक सुरळीत ठेवण्यासाठी काही लोकल गाड्यांचे वेळापत्रक बदलावे लागले आहे, तसेच त्यांची गती कमी करावी लागली आहे. यामुळे अप मार्गावर (मुंबईकडे जाणारे) गाड्या उशिराने धावत आहेत. अनेक प्रवासी बदलापूर स्थानकात किंवा इतर स्थानकांवर लोकलची वाट पाहत उभे असल्याने प्लॅटफॉर्मवर मोठी गर्दी झाली असून प्रवाशांमध्ये संतापाचे वातावरण आहे.
रेल्वे प्रशासन आणि तांत्रिक पथक वांगणी-बदलापूर दरम्यान सक्रिय झालेल्या अग्निरोधक यंत्रणेची तात्काळ तपासणी करून ती लवकरात लवकर पूर्ववत करण्याचे युद्धपातळीवर प्रयत्न करत आहेत.
