Mumbai Local News : (24 ऑगस्ट) रविवारी मध्य रेल्वे आणि हार्बर लाईनवर मेगाब्लॉक; लोकल प्रवास करणाऱ्यांनी लक्ष द्या

Mumbai Local Train Update : माटुंगा ते मुलुंड आणि ठाणे ते वाशी/नेरूळ दरम्यान दुरुस्तीची कामे

मुंबई :- मुंबईकरांनो, जर तुम्ही (24 ऑगस्ट) रविवारी लोकलने प्रवास करण्याचा विचार करत असाल, तर ही बातमी तुमच्यासाठी महत्त्वाची आहे. मध्य रेल्वेने माटुंगा ते मुलुंड आणि हार्बर रेल्वेने ठाणे ते वाशी/नेरूळ दरम्यान रुळांच्या दुरुस्ती आणि देखभालीच्या कामांसाठी मेगाब्लॉक घोषित केला आहे. यामुळे रविवारी लोकल प्रवास करणाऱ्या प्रवाशांना काही प्रमाणात अडचण येऊ शकते. Mumbai Local Train Update

मध्य रेल्वेवर काय स्थिती?

मध्य रेल्वेच्या मुख्य मार्गावर माटुंगा ते मुलुंड दरम्यान अप आणि डाउन धीम्या मार्गावर सकाळी 11.05 ते दुपारी 3.55 या वेळेत मेगाब्लॉक असेल. या काळात धीम्या मार्गावरील लोकल जलद मार्गावर वळवण्यात येतील. यामुळे काही लोकल फेऱ्या रद्द करण्यात आल्या आहेत, तर काही सुमारे २० मिनिटे विलंबाने धावतील. प्रवाशांनी आपल्या प्रवासाचे नियोजन त्यानुसार करावे.

हार्बर रेल्वेवर काय स्थिती?

ठाणे ते वाशी/नेरूळ दरम्यान हार्बर रेल्वेवर अप आणि डाउन मार्गावर सकाळी 11.10 ते दुपारी 4.10 या वेळेत मेगाब्लॉक असेल. या काळात ठाणे ते वाशी/नेरूळ/पनवेल दरम्यानच्या लोकल फेऱ्या पूर्णपणे रद्द असतील. त्यामुळे या मार्गावर प्रवास करणाऱ्या प्रवाशांना विशेष काळजी घ्यावी लागेल.

पश्चिम रेल्वेवर दिलासा

दरम्यान, पश्चिम रेल्वेने प्रवाशांना दिलासा दिला आहे. वसई रोड यार्डात केवळ मालवाहतूक मार्गावर शनिवारी मध्यरात्री 12.30 ते पहाटे 4.30 या वेळेत रात्रकालीन ब्लॉक असणार आहे. त्यामुळे रविवारी दिवसा पश्चिम रेल्वेवर कोणताही मेगाब्लॉक नसेल. यामुळे चर्चगेट, बोरिवली आणि विरार मार्गावरील लोकल सेवा सुरळीत चालणार आहे.

लोकल प्रवास होणार अधिक वेगवान

पश्चिम रेल्वेने गेल्या दोन वर्षांत 15 ठिकाणी असलेली वेगमर्यादा हटवली आहे. यामुळे लोकल गाड्या अधिक वेगाने धावू शकणार आहेत. रुळांची दुरुस्ती, पुलांची मजबुतीकरण आणि अन्य पायाभूत सुविधांची कामे पूर्ण झाल्याने हा बदल शक्य झाला आहे. यामुळे भविष्यात प्रवाशांचा वेळ वाचणार असून लोकल प्रवास अधिक वेगवान होणार आहे.