Mumbai Crime News : 4.12 कोटींच्या शेअर मार्केट फसवणुकीचा मुख्य दुवा हाती! मुंबई सायबर पोलिसांकडून ‘फर्स्ट लेयर’ बँक खातेधारक गोरेगावमधून जेरबंद

•बनावट ॲपद्वारे कोट्यवधीची फसवणूक; आरोपी भाविक पेठानाच्या खात्यात एक कोटी 50 लाख रुपये जमा झाल्याचे उघड.

मुंबई :- बनावट शेअर मार्केट ॲप्स आणि खोट्या नफ्याचे आमिष दाखवून कोट्यवधी रुपयांची फसवणूक करणाऱ्या आंतरराज्यीय सायबर टोळीतील एका महत्त्वाच्या बँक खातेधारकाला दक्षिण विभाग सायबर पोलीस ठाण्याच्या गुन्हे शाखेने अटक केली आहे. आरोपीच्या बँक खात्यात थेट 1 कोटी 50 लाख रुपये जमा झाल्याचे निष्पन्न झाले आहे.याप्रकरणी दक्षिण विभाग सायबर पोलीस ठाण्यात गुन्हा नोंद करण्यात आला आहे.

दुसरा आरोपी अटकेत

गुन्ह्याच्या तपासादरम्यान, फिर्यादीच्या बँक खात्यातून ‘Ascent IT Service’ या कोलकत्ता येथील कंपनीच्या बँक खात्यावर दोन ट्रान्झॅक्शनद्वारे 1.50 कोटी रुपये (एक कोटी पन्नास लाख रुपये) वळते झाल्याचे आढळले. या कंपनीच्या ‘केवायसी’ची तपासणी केली असता, त्याचे एक डायरेक्टर भाविक मोहन पेठाना (रा. गोरेगाव, मुंबई) असल्याचे उघड झाले.

पोलिसांनी शोध घेऊन आरोपी भाविक पेठाना याला ताब्यात घेतले आणि गुन्ह्यात त्याचा थेट सहभाग आढळल्याने त्याला अटक करण्यात आली आहे. यापूर्वी 16 सप्टेंबर रोजी याच गुन्ह्यातील पहिल्या लेयरच्या खात्यात 31 लाख रुपये गेलेल्या रेहान नियाज अहमद ठाणगे या आरोपीला पोलिसांनी अटक केली होती.

देशभरात 74 तक्रारी

अटक आरोपी भाविक मोहन पेठाना हा डायरेक्टर असलेल्या कंपनीच्या बँक खात्याविरुद्ध नॅशनल सायबर क्राईम पोर्टलवर देशभरातून 74 तक्रारी दाखल असल्याची खळबळजनक माहिती समोर आली आहे.

पोलीस आयुक्त देवेन भारती आणि इतर वरिष्ठ अधिकाऱ्यांच्या सूचना व मार्गदर्शनाखाली दक्षिण विभाग सायबर पोलीस ठाण्याच्या पथकाने ही उत्कृष्ट कारवाई केली असून, या आंतरराज्यीय रॅकेटच्या मुळापर्यंत पोहोचण्याचे प्रयत्न सुरू आहेत.