Mumbai Breaking News : “मुंबईच्या महापौरपदावर तडजोड नको!” भाजप हायकमांडचा फडणवीसांना कडक संदेश; शिंदे गटाची ‘अडीच वर्षांची’ मागणी फेटाळण्याचे संकेत

Mumbai Political Latest News : सर्वात मोठा पक्ष म्हणून भाजपचाच दावा; इतर महापालिकांत वाटा देण्याची तयारी पण मुंबईचा ‘मान’ सोडणार नाही; महायुतीत सत्तेचा पेच वाढला

मुंबई | बृहन्मुंबई महानगरपालिका निवडणुकीत 89 जागा जिंकून ऐतिहासिक यश मिळवल्यानंतर, आता महापौरपदावरून महायुतीमधील संघर्ष तीव्र झाला आहे. उपमुख्यमंत्री एकनाथ शिंदे यांच्या नेतृत्वाखालील शिवसेनेने पहिल्या अडीच वर्षांसाठी महापौरपदाची मागणी केल्यामुळे पेच निर्माण झाला असतानाच, दिल्लीतील भाजप पक्षश्रेष्ठींनी या वादात उडी घेतली आहे. “मुंबईच्या महापौरपदाबाबत कोणत्याही प्रकारची तडजोड करू नका,” असा अत्यंत कडक आणि स्पष्ट संदेश हायकमांडने मुख्यमंत्री देवेंद्र फडणवीस यांना दिला आहे. यामुळे आता मुंबईवर भाजपचाच झेंडा फडकणार असल्याचे जवळपास निश्चित मानले जात असून, शिंदे गटाला मनवण्यासाठी भाजपला नवी रणनीती आखावी लागणार आहे.Mumbai Political Latest News

मुंबई महापालिकेत बहुमतासाठी 114 हा आकडा आवश्यक आहे. भाजपला मिळालेल्या 89 जागांमुळे त्यांना सत्तेसाठी शिंदे गटाच्या 29 नगरसेवकांची साथ अनिवार्य आहे. हीच संधी साधत एकनाथ शिंदे यांनी मुंबईचा ‘प्रथम नागरिक’ शिवसेनेचा असावा, असा प्रस्ताव मांडला होता. मात्र, दिल्लीतील नेतृत्वाने ही मागणी अमान्य केली आहे. “भाजप हा मुंबईत सर्वात मोठा पक्ष ठरला आहे आणि हे यश अनेक वर्षांच्या प्रतीक्षेनंतर मिळाले आहे. त्यामुळे भाजपच्या कार्यकर्त्यांच्या भावना लक्षात घेता, महापौरपद आपल्याकडेच ठेवण्याबाबत मित्रपक्षांना विश्वासात घ्या,” अशा सूचना केंद्राने दिल्या आहेत. हा संदेश फडणवीस यांच्यापर्यंत पोहोचल्याने आता वाटाघाटीचे स्वरूप बदलण्याची शक्यता आहे.

मिळालेल्या माहितीनुसार, मुंबईच्या महापौरपदाच्या बदल्यात भाजप इतर महापालिकांमध्ये मोठी लवचिकता दाखवण्याची तयारी करत आहे. राज्यातील ज्या 29 महापालिकांच्या निवडणुका झाल्या आहेत, त्यापैकी अन्य महत्त्वाच्या शहरांमध्ये शिंदे गट आणि अजित पवार यांच्या राष्ट्रवादीला झुकते माप देऊन मुंबईचा पेच सोडवण्याचे संकेत देण्यात आले आहेत. तसेच मुंबई महापालिकेतील ‘स्थायी समिती’सारखी महत्त्वाची पदे शिंदे गटाला देऊन त्यांची नाराजी दूर करण्याचा प्रयत्न केला जाईल. मात्र, महापौरपदाच्या बाबतीत भाजप आता ‘बॅकफूट’वर जाण्यास तयार नसल्याचे स्पष्ट झाले आहे. आता फडणवीस हा दिल्लीचा ‘नो-कॉम्प्रमाईज’ संदेश उपमुख्यमंत्री एकनाथ शिंदेंना कसा पटवून देतात, यावरच महायुतीचे भवितव्य अवलंबून आहे.