Mumbai Bomb Blast Threat : गणेश विसर्जनाच्या दिवशी मुंबई हादरली, मानवी बॉम्बने शहर उडवण्याची धमकी; नोएडा पोलिसांकडून आरोपीला अटक!

Mumbai Bomb Blast Threat Call Latest News : 34 वाहनांमध्ये 400 किलो RDX पेरल्याचा संदेश, गणेशोत्सवाच्या उत्साहात विघ्न; आरोपी मुंबई पोलिसांच्या ताब्यात

मुंबई :- अनंत चतुर्दशीच्या उत्साहात मुंबईसह राज्यभरात गणपती विसर्जन सुरू असताना शहराला बॉम्बस्फोटाची धमकी मिळाल्याने एकच खळबळ उडाली होती. मुंबई वाहतूक पोलिसांच्या व्हॉट्सॲपवर एक धमकीचा संदेश आला होता, ज्यात तब्बल 34 वाहनांमध्ये मानवी बॉम्ब आणि 400 किलो RDX पेरल्याचा उल्लेख होता. या संदेशामुळे पोलीस प्रशासन तत्काळ सतर्क झाले आणि तपास यंत्रणांना पाचारण करण्यात आले. Mumbai Bomb Blast Threat Call

या गंभीर धमकीनंतर मुंबई पोलिसांकडून तातडीने तपास सुरू झाला. पोलिसांनी धमकी देणाऱ्या व्यक्तीचा शोध घेण्यास सुरुवात केली. अखेर, हे विघ्न आता दूर झाले आहे. उत्तर प्रदेशातील नोएडा पोलिसांनी या प्रकरणी एका व्यक्तीला अटक केली असून त्याला पुढील चौकशीसाठी मुंबईत आणले जात आहे.

नोएडा पोलिसांनी अटक केलेल्या आरोपीचे नाव अश्विन कुमार सुप्रा (वय 50) आहे. तो मूळचा बिहारचा असून गेल्या पाच वर्षांपासून नोएडामध्ये राहत होता. पोलिसांनी धमकी देण्यासाठी वापरलेला फोन आणि सिम कार्ड जप्त केले आहे. या प्रकरणाची पुढील चौकशी आता मुंबई पोलीस करणार आहेत.

आरोपीने आपल्या संदेशात “लष्कर-ए-जिहादी” या संघटनेचे नाव वापरून भारतात 14 पाकिस्तानी दहशतवादी घुसल्याचा दावा केला होता. या बॉम्बस्फोटामुळे सुमारे एक कोटी लोक मारले जातील, असेही त्याने म्हटले होते. या संदेशामुळे मुंबईत मोठा तणाव निर्माण झाला होता. मात्र, पोलिसांच्या जलद आणि प्रभावी कारवाईमुळे ही गंभीर धमकी आता निष्प्रभ झाली आहे.