Mumbai BMC Election : मुंबईत ‘काँग्रेस-वंचित’ आघाडीत गोंधळ! 16 प्रभागांत उमेदवारच मिळेना; शेवटच्या क्षणी काँग्रेसची धावपळ

Mumbai Congress VBA Latest News : वंचितने उमेदवार नसल्याने 16 जागा केल्या परत; मुंबई काँग्रेस अध्यक्षा वर्षा गायकवाड यांच्या नाराजीची चर्चा

मुंबई | मुंबई महानगरपालिका निवडणुकीसाठी (BMC Election 2026) अर्ज भरण्याच्या शेवटच्या दिवशी (30 डिसेंबर 2025) काँग्रेस, वंचित बहुजन आघाडी आणि राष्ट्रीय समाज पक्ष (रासप) यांच्या आघाडीत मोठा तांत्रिक पेच निर्माण झाला. ‘वंचित’ला मिळालेल्या 62 जागांपैकी तब्बल 16 जागांवर योग्य उमेदवार न मिळाल्याने ऐनवेळी या जागा काँग्रेसला परत करण्यात आल्या. यामुळे अखेरच्या तासांत या जागांवर आपले उमेदवार उभे करण्यासाठी काँग्रेस नेत्यांची मोठी दमछाक झाली.

16 जागांचा पेच आणि ‘वंचित’ची स्पष्टोक्ती

जागावाटपाच्या सूत्रानुसार, एकूण 227 जागांपैकी काँग्रेस 153, वंचित 62 आणि रासप 12 जागा लढवणार होते. मात्र, ऐनवेळी वंचित बहुजन आघाडीने 16 जागांवर उमेदवार नसल्याचे सांगत त्या काँग्रेसला परत केल्या.

“काँग्रेसने आम्हाला ज्या जागा दिल्या होत्या, तिथे आमचे संघटन कमकुवत होते. त्यामुळे तिथे उमेदवार उभे करणे कठीण झाले आणि आम्ही त्या जागा सन्मानाने काँग्रेसला परत केल्या,” असे वंचितचे प्रवक्ते सिद्धार्थ मोकळे यांनी स्पष्ट केले.

काँग्रेसची धावपळ आणि सपकाळांची माहिती

वंचितने जागा परत केल्यावर काँग्रेसने तत्काळ आपल्या कार्यकर्त्यांना या 16 प्रभागांमध्ये नामांकन भरण्याच्या सूचना दिल्या. काँग्रेसचे प्रदेशाध्यक्ष हर्षवर्धन सपकाळ यांनी सांगितले की, “आम्ही परिस्थिती हाताळली असून सर्व 16 जागांवर काँग्रेसचे उमेदवार आता रिंगणात आहेत. यामुळे मुंबईत काँग्रेस लढवत असलेल्या एकूण जागांची संख्या आता 167 झाली आहे.”

अंतर्गत नाराजी आणि वर्षा गायकवाड यांची अनुपस्थिती
वंचित बहुजन आघाडीसोबतच्या युतीमुळे मुंबई काँग्रेसमध्ये सर्व काही आलबेल नसल्याचे समोर आले आहे.

मुंबई अध्यक्षांची नाराजी: काँग्रेसच्या मुंबई अध्यक्षा वर्षा गायकवाड या आघाडीच्या अधिकृत घोषणेवेळी गैरहजर होत्या. वंचितला अनेक अनुसूचित जातीचे (SC) प्रभाग दिल्याने स्थानिक काँग्रेस नेत्यांमध्ये मोठा असंतोष आहे.

वंचितने 62 जागांची यादी आधीच निश्चित करून त्यावर प्रदेशाध्यक्षांच्या सह्या घेतल्या होत्या, ज्यामुळे मुंबई काँग्रेसच्या स्थानिक नेतृत्वाला डावलल्याची भावना निर्माण झाली आहे.