Mira Road Cyber Crime News : सायबर ठगांचा गेम ओव्हर! मिरा रोड पोलिसांची भन्नाट कामगिरी, 1.5 लाखांचा ऑनलाईन घोटाळा 72 तासांत परत!

•फसवणुकीचा शिकार झालेल्या महिलेला दिला दिलासा, सायबर पोलिसांनी केली आर्थिक सुटका

मिरा रोड :– ऑनलाईन खरेदीत फसवणूक झाल्यावर बहुतांश नागरिक हार मानतात, पण मिरा-भाईंदर सायबर पोलिसांनी एका महिलेला 1.50 लाख रुपयांची रक्कम पुन्हा मिळवून देत धाडसी आणि तत्परतेचा उत्तम दाखला दिला आहे.

तक्रारदार इरनाक यांनी सोशल मीडियावर एका वेबसाईटवर मोबाईल फोनच्या कमी किमतीतील जाहिरात पाहून खरेदीचा निर्णय घेतला. त्यांनी सदर वेबसाईटवरून 1.50 लाख रुपये ऑनलाईन पाठवले. मात्र मोबाईल वेळेत न पोहोचल्याने फसवणुकीची जाणीव झाली.

त्यानंतर त्यांनी मिरा रोड सायबर पोलीस ठाण्यात तक्रार दाखल केली. सायबर क्राईम पोर्टलवर नोंद घेतल्यावर, पोलिसांनी तातडीने तपास सुरू केला. ऑनलाईन व्यवहाराच्या तांत्रिक तपासणीत फसवणूक झालेली रक्कम एका ई-कॉमर्स खात्यात वळवण्यात आल्याचे निष्पन्न झाले.

पोलिस निरीक्षक सुजितकुमार गुंजकर आणि त्यांच्या पथकाने संबधित ई-कॉमर्स कंपनीसोबत पत्रव्यवहार करून रक्कम रोखण्यात यश मिळवले. अखेर तक्रारदाराच्या मूळ बँक खात्यात 1.5 लाख रुपये परत जमा करण्यात आले.

ही संपूर्ण कारवाई पोलीस उप आयुक्त संदीप डोईफोडे, सहायक आयुक्त मदन बल्लाळ यांच्या मार्गदर्शनाखाली पोलीस अधिकारी स्वप्नील वाव्हळ, प्रसाद शेनोळकर, वैभव धनवडे, अमिना पठाण, स्नेहल पुणे, कुणाल सावळे, माधुरी धिंडे आणि सायन शेवाळे यांच्या संयुक्त प्रयत्नातून पार पडली.