Maratha Reservation Update : मराठा आंदोलकांना रेल्वे प्रवासासाठी महत्त्वाच्या सूचना जारी

Mumbai Railway Latest News : ट्रेनमध्ये बाहेर लटकू नका, ट्रॅकवर उतरू नका’, सकल मराठा समाजाचे आवाहन

मुंबई :- मराठा आरक्षणासाठी मनोज जरांगे पाटील यांच्या नेतृत्वाखाली मुंबईत सुरू असलेल्या उपोषणात सहभागी होणाऱ्या मराठा बांधवांसाठी नवी मुंबईतील सकल मराठा समाजाने महत्त्वाच्या सूचना जारी केल्या आहेत. विशेषतः, रेल्वे प्रवासादरम्यान सुरक्षितता बाळगण्याचे आणि नोकरदार प्रवाशांची गैरसोय टाळण्याचे आवाहन या सूचनांमधून करण्यात आले आहे.

नेमक्या सूचना काय?

नवी मुंबईतील सकल मराठा समाजाच्या वतीने जाहीर करण्यात आलेल्या सूचनांमध्ये खालील गोष्टींवर भर देण्यात आला आहे:

रेल्वे ट्रॅकवर उतरू नका: ही सर्वात महत्त्वाची सूचना आहे. कोणत्याही परिस्थितीत रेल्वे ट्रॅकवर उतरू नये, असे स्पष्टपणे सांगण्यात आले आहे, जेणेकरून अपघात टाळता येतील.

ट्रेनमध्ये बाहेर लटकू नका: धोकादायक प्रवास टाळण्यासाठी ट्रेनच्या दरवाज्यात किंवा बाहेर लटकून प्रवास न करण्याचे आवाहन करण्यात आले आहे.

गर्दीच्या वेळी प्रवास टाळा: नोकरदार वर्ग सकाळी (5 ते 8) आणि सायंकाळी (8 ते 9) मोठ्या संख्येने प्रवास करतो. त्यामुळे आंदोलकांनी या वेळेत प्रवास टाळावा. आवश्यक असल्यास सकाळी 10 नंतर आणि संध्याकाळी 9 नंतर प्रवास करण्यास प्राधान्य द्यावे, असे सुचवण्यात आले आहे.

या सूचना जारी करण्यामागे मराठा बांधवांचा प्रवास सुरक्षित व्हावा आणि त्याचवेळी मुंबईतील सामान्य नोकरदार प्रवाशांना कोणताही त्रास होऊ नये, हा दुहेरी उद्देश आहे. पाच दिवसांच्या गणपती विसर्जन आणि सुट्ट्या संपल्यामुळे आजपासून मुंबईच्या लोकलमध्ये मोठी गर्दी होण्याची शक्यता आहे, त्यामुळे या सूचना विशेष महत्त्वाच्या ठरतात.