Maharashtra Politics : राज्याचे नवे मुख्यमंत्री देवेंद्र फडणवीस उपमुख्यमंत्री अजित पवार आणि एकनाथ शिंदे यांनी दादरच्या चैत्यभूमीत बाबासाहेबांना केले अभिवादन
•राज्यपाल सी.पी राधाकृष्णन, मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार यांच्या उपस्थितीत महापरिनिर्वाण दिनानिमित्त बाबासाहेबांना केले अभिवादन
मुंबई :- राज्यपाल सी.पी. राधाकृष्णन, मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री अजित पवार यांच्या उपस्थितीमध्ये चैत्यभूमी परिसरात अभिवादन कार्यक्रमाचे आयोजन करण्यात आले होते. यावेळी डॉ. नरेंद्र जाधव लिखित ‘भारतीय प्रजासत्ताक साकारणारा महामानव’ या पुस्तकाचे प्रकाशन मान्यवरांच्या हस्ते करण्यात आले आहे.
राज्य सरकार म्हणून आम्ही जे कार्य करू ते संविधान अनुरूप करू. तसेच ते काम करत असताना समाजातील शेवटचा घटक म्हणजेच वंचिताचा विचार करून काम करणार असल्याचे मुख्यमंत्री देवेंद्र फडणवीस यांनी म्हटले आहे. महामानव डॉ. बाबासाहेब आंबेडकर यांच्या महापरिनिर्वाण दिनानिमित्त चैत्यभूमी येथे अभिवादन कार्यक्रमाचे आयोजन करण्यात आले होते, यावेळी ते बोलत होते.
डॉ. बाबासाहेब आंबेडकर यांनी दिलेला समतेचा, समानतेचा संदेश आपल्या संविधानाच्या माध्यमातून आपण अंगीकारला असल्याचे फडणवीस यांनी म्हटले आहे. यावेळी नरेंद्र जाधव यांच्या पुस्तकाबद्दल देखील फडणवीस यांनी त्यांचे अभिनंदन आणि आभार मानले. भारतीय संविधानाचा इतिहास आणि कशाप्रकारे प्रकारे बाबासाहेब आंबेडकर यांच्या विचाराने हे संविधान तयार होत गेले, याचा अतिशय सुंदर आलेख नरेंद्र जाधव यांच्या पुस्तकात आला असल्याचे फडणवीस यांनी म्हटले आहे.
