Mira Bhayandar News : मीरा-भाईंदरमध्ये पूरसदृश परिस्थिती; माजी आमदार गिल्बर्ट मेंडोन्सा यांचा अंत्यविधी पुढे ढकलला

Mira Bhayandar Latest News : ज्येष्ठ नेते मेंडोन्सा यांचे पार्थिव अंतिम दर्शनासाठी निवासस्थानी; 25 ऑगस्ट रोजी शोकसभा

मीरा रोड :- मीरा-भाईंदरमध्ये मंगळवारी सकाळपासून सुरू असलेल्या जोरदार पावसामुळे पूरसदृश परिस्थिती निर्माण झाली आहे. शहरातील अनेक सखल भागांमध्ये पाणी साचले असून, वाहतूक विस्कळीत झाली आहे. या गंभीर परिस्थितीमुळेच, नुकतेच निधन झालेले मीरा-भाईंदरचे माजी आमदार गिल्बर्ट मेंडोन्सा Gilbert John Mendonca, passed away  यांच्या अंत्यविधीची प्रक्रिया एक दिवस पुढे ढकलण्याचा निर्णय त्यांच्या कुटुंबीयांनी घेतला आहे.

यूरीन इन्फेक्शनमुळे निधन

माजी आमदार गिल्बर्ट मेंडोन्सा यांचे सोमवारी मुंबई येथील बॉम्बे रुग्णालयात यूरीन इन्फेक्शनच्या आजाराशी झुंज देताना निधन झाले. त्यांच्या निधनाने राजकीय आणि सामाजिक वर्तुळात हळहळ व्यक्त केली जात आहे. त्यांचे पार्थिव सध्या भाईंदर (पश्चिम) येथील त्यांच्या निवासस्थानी अंतिम दर्शनासाठी ठेवण्यात आले आहे.

शहरातील परिस्थितीमुळे निर्णय

मेंडोन्सा यांचा अंत्यविधी मंगळवारी सायंकाळी चार वाजता भाईंदर येथील ‘अवर लेडी ऑफ नाझरेथ चर्च’मध्ये होणार होता. मात्र, जोरदार पाऊस आणि रस्त्यांवर साचलेले पाणी यामुळे मोठ्या संख्येने येणाऱ्या नागरिकांना त्रास होऊ नये, यासाठी कुटुंबीयांनी हा निर्णय घेतला. त्यांच्या निकटवर्तीयांनी समाजमाध्यमांवर ही माहिती प्रसिद्ध केली आहे. आता त्यांचा अंत्यविधी बुधवारी (20 ऑगस्ट) सायंकाळी चार वाजता पार पडणार आहे. तसेच, त्यांच्यासाठी 25 ऑगस्ट रोजी शोकसभा आयोजित केली जाणार आहे.