Mahadev Jankar : “आई शप्पथ सांगतो, कमळाला मतदान करू नका..; महादेव जानकर

•जतमध्ये महादेव जानकर यांचा भाजपवर थेट हल्लाबोल; अप्रत्यक्षपणे मविआला पाठिंबा जाहीर करत म्हणाले, “जाती-जातीत भांडण लावणारा पक्ष!”

सांगली :- राज्यातील 246 नगरपालिका आणि 42 नगरपंचायतींच्या निवडणुकीसाठी रणधुमाळी सुरू असतानाच, सांगली जिल्ह्यातील जत नगरपरिषदेच्या निवडणुकीत राष्ट्रीय समाज पक्षाचे नेते व माजी मंत्री महादेव जानकर यांनी भाजपवर अत्यंत कठोर शब्दांत टीका केली आहे. जानकर यांनी या निमित्ताने अप्रत्यक्षपणे महाविकास आघाडीच्या (मविआ) उमेदवाराला पाठिंबा देत युतीचे संकेत दिले आहेत.

कमळाला मतदान करू नका, जाहीर विनंती!

राजकीयदृष्ट्या महत्त्वाच्या मानल्या जाणाऱ्या जत नगरपरिषदेत सध्या चौरंगी लढत आहे. महाविकास आघाडीचे नगराध्यक्ष पदाचे उमेदवार सुजय शिंदे यांच्या प्रचारार्थ आयोजित केलेल्या सभेत महादेव जानकर यांनी हजेरी लावली आणि अत्यंत आक्रमक भाषण केले.

भाजपवर जोरदार हल्लाबोल करताना ते म्हणाले, “मी त्यांच्या (भाजपच्या) छावणीत राहून आलो आहे. मला त्यांची नियत आणि नीती चांगलीच माहिती आहे. आरक्षणाचे गाजर तुम्हाला दाखवलं जाईल, पण ते दिलं जाणार नाही. समाजात भांडण झाली, तुम्हाला तुमच्या भागीदारापासून बाजूला करण्याचे पाप भाजपने केले आहे.”

याच भाषणात त्यांनी मतदारांना हात जोडून विनंती केली: “तुम्ही कोणालाही मतदान करा, पण आई शप्पथ सांगतो, कमळाला मतदान करू नका!”

जाती-जातीत भांडण लावणारा पक्ष
भाजप जाती-जातीत भांडण लावणारा पक्ष असल्याचा गंभीर आरोप जानकर यांनी केला. तसेच, राज्यातील सत्तासंघर्षावर भाष्य करताना त्यांनी मुख्यमंत्री आणि उपमुख्यमंत्र्यांवरही निशाणा साधला:

“कारण भाजपा जाती-जातीत भांडण लावणार पक्ष आहे. आज एकनाथ शिंदे व अजित पवारांची काय अवस्था आहे, तशी अवस्था माझी झाली नाही, कारण मी या भानगडी केल्या नाहीत.”

राजकीय परिणामांची शक्यता

महादेव जानकर यांनी जतच्या व्यासपीठावरून केलेले हे जाहीर विधान सांगली जिल्ह्याच्या आणि महाराष्ट्राच्या राजकारणात अत्यंत महत्त्वाचे मानले जात आहे. जानकर यांच्या आवाहनामुळे धनगर समाजाची मते फुटण्याची शक्यता वर्तवली जात आहे. तसेच, मोठ्या प्रमाणात धनगर समर्थक भाजपपासून दूर जाऊन मविआकडे वळू शकतात, असे राजकीय विश्लेषकांचे मत आहे.

या निवडणुकीसाठी येत्या 2 डिसेंबरला मतदान होणार आहे, तर 3 डिसेंबरला मतमोजणी होऊन निकाल जाहीर होईल. जानकर यांच्या या भूमिकेचा नेमका काय परिणाम होतो, याकडे सर्वांचे लक्ष लागले आहे.