CM Devendra Fadanvis : वारकऱ्यांच्या भक्तीमध्ये योगाची शक्ती — पुण्यात ऐतिहासिक योग दिन उत्सव
International Yoga Day 2025 : हजारो वारकऱ्यांसोबत मुख्यमंत्र्यांनी साधला ‘भक्तीयोग’चा समरस स्पर्श
पुणे | जगभर साजऱ्या होणाऱ्या आंतरराष्ट्रीय योग दिनानिमित्त पुण्यात आज एक आगळावेगळा योग महोत्सव अनुभवायला मिळाला. International Yoga Day 2025 शेकडो वारकऱ्यांच्या टाळ-मृदुंगाच्या गजरात ‘वारकरी भक्तीयोग’ हा आगळा कार्यक्रम मुख्यमंत्री देवेंद्र फडणवीस यांच्या प्रमुख उपस्थितीत पार पडला. साधनेच्या पवित्रतेला भक्तीचा स्पर्श देत, योगाची गूढता वारकरी परंपरेशी जोडली गेली.
या उपक्रमाचं आयोजन राज्य शासन, सावित्रीबाई फुले पुणे विद्यापीठ, पुणे महापालिका आणि श्री संत ज्ञानेश्वर-तुकाराम संस्थान यांच्या संयुक्त विद्यमाने करण्यात आलं होतं. कार्यक्रमात हजारो वारकरी, विद्यार्थी, शिक्षक यांनी सामील होत एकात्मतेचा नवा संदेश दिला.
मुख्यमंत्री फडणवीस यांनी उपस्थितांना उद्देशून बोलताना योगाचे महत्व अधोरेखित केलं. “योग ही भारतीय संस्कृतीतील अमूल्य देणगी आहे. शरीर आणि मन यांचा समतोल साधणारा हा मार्ग केवळ आरोग्यासाठी नव्हे तर अध्यात्मासाठीही अत्यंत उपयुक्त आहे,” असे ते म्हणाले.
कर्जमाफीच्या मुद्द्यावर त्यांनी स्पष्ट भूमिका घेत “या सरकारने दिलेला एकही शब्द फिरवणार नाही. निर्णय उचित वेळेला घेतला जाईल,” असे ठाम सांगितले.
याशिवाय त्यांनी पुणे विद्यापीठाच्या शैक्षणिक प्रगतीबाबत समाधान व्यक्त करत, लवकरच प्राध्यापक भरती प्रक्रिया पूर्ण होईल असेही सांगितले.
या योग दिन कार्यक्रमात शिक्षणमंत्री चंद्रकांत पाटील, राज्यमंत्री माधुरी मिसाळ, कुलगुरू डॉ. सुरेश गोसावी, आयुक्त अमितेश कुमार यांच्यासह अनेक मान्यवर उपस्थित होते.
