Asia Cup 2025 : आशिया चषकातही पाकिस्तानवर भारताचा वरचष्मा; युवा खेळाडूंच्या दमदार कामगिरीने टीम इंडियाची विजयी घोडदौड सुरूच
•अभिषेक शर्मा, शुबमन गिलची आक्रमक अर्धशतके, पाकिस्तानचा पुन्हा दारुण पराभव
Asia Cup 2025 :- भारतीय क्रिकेट संघाच्या युवा खेळाडूंनी टी-20 क्रिकेटमध्ये आपणच खरे विश्वविजेते आहोत, हे पुन्हा एकदा सिद्ध करून दाखवले आहे. आशिया चषकाच्या सुपर 4 फेरीतील दुसऱ्या सामन्यात भारताने पारंपरिक प्रतिस्पर्धी पाकिस्तानवर 6 गडी राखून दणदणीत विजय मिळवला. दुबई आंतरराष्ट्रीय क्रिकेट स्टेडियमवर झालेल्या या सामन्यात भारतीय खेळाडूंनी सुरूवातीपासूनच आक्रमक पवित्रा घेत पाकिस्तानला पुनरागमन करण्याची संधीच दिली नाही. या विजयामुळे भारतीय संघाने स्पर्धेतील आपली विजयी घोडदौड कायम ठेवली आहे.
नाणेफेक जिंकून प्रथम गोलंदाजी करण्याचा कर्णधार सूर्यकुमार यादवचा निर्णय योग्य ठरला. भारताने पाकिस्तानला 20 षटकांत 171 धावांवर रोखले. प्रत्युत्तरात, 172 धावांचे आव्हान घेऊन मैदानात उतरलेल्या भारतीय संघाला अभिषेक शर्मा आणि शुबमन गिल या सलामीच्या जोडीने दमदार सुरूवात करून दिली. या दोघांनी अवघ्या 9 षटकांतच संघाला 100 धावांचा टप्पा गाठून दिला. अभिषेकने केवळ 24 चेंडूत अर्धशतक पूर्ण करत धमाकेदार खेळी केली. गिलनेही त्याला तोलामोलाची साथ देत 47 धावा केल्या. अभिषेक 74 धावांवर बाद झाला, तर गिल 47 धावा करून तंबूत परतला. त्यानंतर आलेल्या सूर्यकुमार यादव आणि संजू सॅमसन यांनी छोटी खेळी खेळली. मात्र, अखेरच्या क्षणी तिलक वर्मा आणि हार्दिक पांड्या यांनी संयमी फलंदाजी करत संघाला विजय मिळवून दिला.
या सामन्याची सुरूवातही गेल्या सामन्याप्रमाणेच चर्चेत राहिली. कर्णधार सूर्यकुमार यादवने नाणेफेकीवेळी पाकिस्तानच्या कर्णधारासोबत हस्तांदोलन करणे टाळले. या विजयानंतर भारतीय क्रिकेट चाहत्यांमध्ये उत्साहाचे वातावरण असून, भारतीय संघाकडून अंतिम विजेतेपदाची अपेक्षा व्यक्त केली जात आहे.
