वाईन शॉपवर ‘दारू-धाड’: वाशीतील दुकानातून 17 लाखांचे महागडे मद्य लंपास

Navi Mumbai Robbery News : वाशी पोलिसांकडून आरोपीचा शोध सुरू; सीसीटीव्ही फूटेज तपासले जात आहे,शटर उचकटून दुकानात घुसखोरी

नवी मुंबई | नवी मुंबईतील वाशी Navi Mumbai परिसरातील उच्चभ्रू मद्य विक्री करणाऱ्या “व्ही फाय लिव्हिंग लिक्विड्स” वाईन शॉपमध्ये अज्ञात चोरट्यांनी शटर उचकटून धाडसी चोरी केली आहे. या चोरीत तब्बल 17 लाख 38 हजार 588 रुपये किमतीच्या मद्याच्या बाटल्या आणि 20 हजार रुपयांची रोकड लंपास करण्यात आली आहे. एकूण चोरीचा आकडा 17 लाख 58 हजार 588 रुपये इतका असून वाशी पोलीस ठाण्यात Vashi Police Station अज्ञात चोराविरोधात गुन्हा दाखल करण्यात आला आहे. Navi Mumbai Latest Crime News

ही घटना वाशी गावातील सिद्धिविनायक इमारतीत असलेल्या नामांकित वाईन शॉपमध्ये घडली. 10 जुलै रोजी रात्री दुकान बंद करताना व्यवस्थापक आणि रोखपालाने नियमितप्रमाणे हिशोब पूर्ण करून दुकान बंद केलं होतं. मात्र 11 जुलै रोजी सकाळी दुकान उघडण्यास आल्यानंतर शटर उचकटलेलं आणि आतील साहित्य अस्ताव्यस्त असल्याचे आढळून आले.

दुकानाच्या गल्ल्यातील 20 हजार रुपयांची रोकड गायब होती, आणि महागड्या मद्याच्या 107 बाटल्या चोरीस गेल्याचं ऑडिट दरम्यान निष्पन्न झालं. त्या बाटल्यांची एकूण किंमत तब्बल 17.38 लाख रुपये आहे.

घटनेनंतर व्यवस्थापनाकडून इन्व्हेंटरी ऑडिट करून खातरजमा करण्यात आली आणि त्यानंतर अधिकृत तक्रार वाशी पोलीस ठाण्यात दाखल करण्यात आली. यावरून पोलिसांनी अज्ञात चोरट्याविरोधात चोरीचा गुन्हा नोंदवून तपास सुरू केला आहे.

वाशी पोलीस ठाण्याचे उपनिरीक्षक कुलदीप देशमुख यांच्या मार्गदर्शनाखाली या प्रकरणाचा तपास सुरू असून, सीसीटीव्ही फूटेज व आसपासच्या परिसरातील हालचालींची तपासणी केली जात आहे. चोरट्यांनी दुकानाचे शटर उचकटून विशेष कौशल्याने ही चोरी केल्याने, हे स्थानिक गुन्हेगारांचे टोळीगत कृत्य असण्याची शक्यता पोलिसांनी वर्तवली आहे.