Dombivali Crime News : डोंबिवलीत 16 वर्षीय मुलाचे अपहरण, चाकूहल्ला; पूर्ववैमनस्यातून चार जणांचा थरारक घातपात

dombivli crime news minor boy kidnapped and knife attacked by four youths : विवादातून रोष वाढला, सुनीलनगरच्या तरुणांनी भोपर रस्त्यावर नेऊन बेदम मारहाण

डोंबिवली – पूर्वीच्या किरकोळ वादातून उफाळून आलेल्या रोषातून चार तरुणांनी 16 वर्षीय अल्पवयीन मुलाचे अपहरण करून त्याच्यावर चाकूहल्ला केल्याची धक्कादायक घटना सोमवारी रात्री घडली. भोपर रस्त्यालगत निर्जन ठिकाणी या मुलाला बेदम मारहाण करून गंभीर जखमी करण्यात आले असून, हल्लेखोरांनी त्याला आणि त्याच्या वडिलांना जीवे मारण्याची धमकीही दिली आहे.

सोमवारी सायंकाळी सातच्या सुमारास तक्रारदार मुलगा खासगी शिकवणीसाठी गेला असताना पाणी प्यायचे कारण सांगून बाहेर येताच आधीपासून पाळत ठेवणाऱ्या चार तरुणांनी त्याला जबरदस्तीने कारमध्ये ओढले. बचावासाठी मुलाने आरडाओरड केली, मात्र कोणी मदतीला धावले नाही.

पुन्हा आमच्या वाटेला आलास तर तुझ्या वडिलांनाही सोडणार नाही’ – धमकी देत आरोपी फरार

सुनीलनगर परिसरातील दोन सुस्थितीत घरातील तरुण व इतर दोन साथीदारांनी भोपर रस्त्याजवळील अंधाऱ्या भागात नेत त्याच्यावर लाथाबुक्क्यांनी व चाकूने हल्ला केला. ‘पुन्हा आमच्या वाटेला आलास तर तुझ्या वडिलांनाही सोडणार नाही’ असा इशारा देत आरोपींनी त्याला पुन्हा मोटारीत बसवून मानपाडा रस्त्यावरील डी मार्टजवळ सोडले आणि पळ काढला.

रक्तबंबाळ अवस्थेत घरी परतलेल्या मुलाने सर्व प्रकार घरच्यांना सांगितल्यावर पालकांनी तत्काळ मानपाडा पोलीस ठाणे गाठले. सुनीलनगरमधील प्रमुख आरोपीसह इतर तिघांविरुद्ध गंभीर गुन्ह्यांची नोंद करण्यात आली आहे.

या प्रकरणाचा तपास पोलीस उपनिरीक्षक गणेश भाबड करत असून, आरोपींचा शोध सुरू आहे.