BMC Election 2026 : भाजपचा बंडखोरांना ‘दणका’! मुंबईतील 26 जणांचे 6 वर्षांसाठी निलंबन; आसावरी पाटील, नेहल शहा यांच्यावर कारवाई

•मालाडमध्ये तेजिंदर सिंग तिवानांसाठी खासदार अण्णा मलाई मैदानात; त्रिकोणी लढतीत प्रचाराचा धुरळा

मुंबई | मुंबई महानगरपालिका निवडणुकीच्या (BMC Election 2026) मतदानासाठी अवघे काही दिवस शिल्लक असताना, भाजपने पक्षांतर्गत बंडाळी मोडून काढण्यासाठी ‘सर्जिकल स्ट्राईक’ केला आहे. अधिकृत उमेदवारांविरुद्ध अपक्ष म्हणून निवडणूक लढवणाऱ्या आणि पक्षविरोधी कारवाया करणाऱ्या 26 पदाधिकारी व कार्यकर्त्यांचे पक्षाने 6 वर्षांसाठी निलंबन केले आहे. यामध्ये काही माजी नगरसेविकांचाही समावेश असल्याने राजकीय वर्तुळात खळबळ उडाली आहे.

बंडखोरांवर निलंबनाची कुऱ्हाड

पक्षाच्या वरिष्ठ नेत्यांनी वारंवार सूचना देऊनही अर्ज मागे न घेणाऱ्यांवर ही कारवाई करण्यात आली आहे. मुंबई भाजपचे अध्यक्ष आमदार अमित साटम यांच्या आदेशानुसार ही निलंबनाची कारवाई झाली. यामध्ये प्रामुख्याने खालील नावांचा समावेश आहे:

माजी नगरसेविका: आसावरी पाटील (बोरीवली), नेहल शहा (माटुंगा), जान्हवी राणे (अभ्युदय नगर).

मोठे पदाधिकारी: दिव्या ढोले (वर्सोवा), जयमुरगन नाडार, शोभा साळगावकर.

पक्षाने स्पष्ट केले आहे की, महायुतीच्या अधिकृत उमेदवारांच्या विजयात अडथळा निर्माण करणाऱ्यांची गय केली जाणार नाही.

मालाडमध्ये अण्णा मलाई यांची एन्ट्री; तिवानांसाठी साद

मुंबईतील मालाड (प्रभाग 47) मध्ये भाजपने युवा नेते तेजिंदर सिंग तिवाना यांना उमेदवारी दिली असून, त्यांच्या प्रचारासाठी भाजपने तमिळनाडूचे लोकप्रिय नेते आणि खासदार के. अण्णा मलाई यांना पाचारण केले होते.

दक्षिण भारतीय मतांवर लक्ष: अण्णा मलाई यांनी मालाडमधील दक्षिण भारतीय मतदारांशी संवाद साधत तिवाना यांना विजयी करण्याचे आवाहन केले. “तिवाना हे तरुण आणि अनुभवी नेतृत्व असून त्यांना जनसेवेचा कौटुंबिक वारसा आहे,” असे गौरवोद्गार त्यांनी काढले.

त्रिकोणी लढत: या प्रभागात भाजप, काँग्रेस आणि शिवसेना (ठाकरे गट) यांच्यात काट्याची टक्कर पाहायला मिळत आहे.

विजयाचा विश्वास: तेजिंदर सिंग तिवाना यांनी ‘डोअर-टू-डोअर’ प्रचारावर भर दिला असून, 10 हजारपेक्षा जास्त मताधिक्क्याने निवडून येण्याचा विश्वास व्यक्त केला आहे.