Bihar Bhawan : “मुंबई कुणाच्या बापाची आहे का?” बिहारच्या मंत्र्यांची राज ठाकरेंवर जहरी टीका; ‘बिहार भवन’वरून राजकीय युद्ध पेटलं!

•दक्षिण मुंबईत 30 मजली ‘बिहार भवन’ उभारण्याला मनसेचा कडाडून विरोध; “आधी आपलं राज्य सांभाळा”, मनसेचं बिहार सरकारला सणसणीत प्रत्युत्तर

मुंबई | मुंबईतील दक्षिण भागात प्रस्तावित असलेल्या 30 मजली ‘बिहार भवन’वरून महाराष्ट्र आणि बिहारमधील राजकीय वातावरण कमालीचे तापले आहे. “महाराष्ट्र काय कुणाच्या बापाचा आहे का?” असा आक्रमक सवाल करत बिहारचे ग्रामविकास मंत्री अशोक चौधरी यांनी राज ठाकरे आणि मनसेवर थेट हल्ला चढवला आहे. या वादग्रस्त विधानामुळे आता मनसे आणि बिहार सरकारमध्ये शाब्दिक युद्ध सुरू झाले असून, मुंबईत पुन्हा एकदा ‘प्रांतीय अस्मितेचा’ संघर्ष पेटण्याची चिन्हे दिसत आहेत.

बिहारच्या मंत्र्यांचा राज ठाकरेंवर थेट निशाणा बिहारमधील नितीश कुमार सरकारमधील ज्येष्ठ मंत्री अशोक चौधरी यांनी मुंबईतील बिहार भवनाला होणाऱ्या विरोधाचा तीव्र शब्दांत निषेध केला. “मुंबईत बिहार भवन उभारू देणार नाही, असे म्हणणारे लोक विकृत मानसिकतेचे आहेत. राज ठाकरे हे काय तिकडचे राजे लागून गेले आहेत का?” असा सवाल त्यांनी केला. मुंबईत कोणत्या राजाची राजवट नाही आणि या देशात कोणाचीही जबरदस्ती चालणार नाही, असे ठणकावून सांगतानाच, कोणत्याही परिस्थितीत मुंबईत बिहार भवन उभारणारच, असा निर्धार चौधरी यांनी व्यक्त केला. विशेषतः कर्करोगाच्या उपचारासाठी बिहारमधून मुंबईत येणाऱ्या गरीब रुग्णांच्या सोयीसाठी हे भवन अत्यंत गरजेचे असल्याचे त्यांनी स्पष्ट केले.

“स्वतःचं राज्य सांभाळा”; मनसेचा पलटवार अशोक चौधरी यांच्या जहरी टीकेला मनसे नेते अविनाश अभ्यंकर यांनी जोरदार प्रत्युत्तर दिले आहे. “अशोक चौधरी यांनी आधी आपले स्वतःचे राज्य सांभाळावे, दुसऱ्यांना अक्कल शिकवू नये. जर तुम्ही तुमची राज्ये नीट ठेवली असती, तर तुमच्या लोकांना उपचारांसाठी किंवा कामासाठी बाहेर फिरावे लागले नसते,” असा टोला अभ्यंकर यांनी लगावला. “महाराष्ट्र हा मराठी माणसाचा आहे, देवाने तोंड दिले म्हणून काहीही बोलू नये,” अशा शब्दांत मनसेने बिहारच्या मंत्र्यांना घरचा अहेर दिला आहे.

असे असेल मुंबईतील 30 मजली ‘बिहार भवन’ दक्षिण मुंबईतील एल्फिन्स्टन इस्टेट (मुंबई पोर्ट ट्रस्टची जागा) येथे हे भव्य भवन उभारण्याची बिहार सरकारची योजना आहे. सुमारे 314 कोटी रुपये खर्च करून बांधण्यात येणारी ही इमारत आधुनिक वास्तूशैलीत असेल. यात 72 आसनांचे सभागृह, प्रशासकीय कार्यालये आणि मुख्यत्वे उपचारासाठी येणाऱ्या रुग्णांच्या नातेवाईकांसाठी निवासाची उत्तम सोय असणार आहे. 0.68 एकर जमिनीवर हे भव्य संकुल उभे राहणार असून, पर्यावरणपूरक तंत्रज्ञानाचा यात वापर केला जाणार आहे.

मुंबईत ‘बिहार भवन’च्या निमित्ताने सुरू झालेला हा वाद आता केवळ इमारतीपुरता मर्यादित न राहता, तो राजकीय अस्मितेचा विषय बनला आहे. एकीकडे बिहार सरकार आपल्या हक्काची भाषा करत आहे, तर दुसरीकडे मनसे मुंबईतील अशा प्रकल्पांना पायबंद घालण्यासाठी आक्रमक झाली आहे.