Bhiwandi News : भिवंडीत महायुतीला रोखण्यासाठी ‘भिवंडी सेक्युलर फ्रंट’ सज्ज; काँग्रेसचा महापौर होणार हे आता निश्चित!

Bhiwandi Political Latest News : काँग्रेस, शरद पवार गट आणि समाजवादी पक्ष यांची महाआघाडी; 48 नगरसेवकांचे संख्याबळ गाठत बहुमताचा आकडा पार

भिवंडी l भिवंडी-निजामपूर शहर महानगरपालिकेच्या निवडणुकीनंतर सत्तास्थापनेचा पेच अखेर सुटला आहे. भाजप आणि शिंदे गटाला सत्तेपासून दूर ठेवण्यासाठी सेक्युलर विचारधारेच्या पक्षांनी एकत्र येत “भिवंडी सेक्युलर फ्रंट” या संयुक्त आघाडीची स्थापना केली आहे. या आघाडीमुळे महापौरपदासाठी आवश्यक असलेला 46 चा बहुमताचा आकडा पार झाला असून, भिवंडीवर आता काँग्रेसप्रणित आघाडीचा झेंडा फडकणार असल्याचे स्पष्ट झाले आहे. Bhiwandi Latest News

पक्षीय बलाबल आणि बहुमताचे गणित भिवंडी महापालिकेच्या एकूण 90 जागांपैकी बहुमतासाठी 46 जागांची आवश्यकता आहे. नव्याने स्थापन झालेल्या ‘भिवंडी सेक्युलर फ्रंट’चे संख्याबळ खालीलप्रमाणे आहे:

काँग्रेस: 30 जागा

राष्ट्रवादी काँग्रेस (शरद पवार गट): 12 जागा

समाजवादी पक्ष: 6 जागा

एकूण संख्याबळ: 48

या 48 नगरसेवकांमुळे आघाडीकडे स्पष्ट बहुमत असून, भाजपचा सत्तास्थापनेचा दावा आता फोल ठरला आहे.

काँग्रेसचा महापौर, हिंदू-मुस्लिम परंपरेचे जतन काँग्रेसचे शहराध्यक्ष रशीद ताहीर मोमीन यांची या फ्रंटच्या अध्यक्षपदी निवड करण्यात आली आहे. “सर्वात मोठा पक्ष असल्याने महापौर काँग्रेसचाच होईल,” असा विश्वास त्यांनी व्यक्त केला. तसेच, भिवंडी महापालिकेत गेल्या 100 वर्षांपासून सुरू असलेली हिंदू-मुस्लिम महापौर व उपमहापौर निवडीची परंपरा यावेळेसही जपली जाईल, असे संकेत काँग्रेसकडून देण्यात आले आहेत.

जबाबदाऱ्यांचे वाटप फ्रंटच्या माध्यमातून शहराच्या विकासाला चालना देण्यासाठी अनुभवी नेत्यांची फळी तयार करण्यात आली आहे:

अध्यक्ष: रशीद ताहीर मोमीन (काँग्रेस शहराध्यक्ष)

कोऑर्डिनेटर: आमदार रईस शेख (समाजवादी पक्ष)

को-कोऑर्डिनेटर: शोएब खान ऊर्फ गुड्डू (राष्ट्रवादी – शरद पवार गट) आणि अजय यादव.

“जनतेने सेक्युलर विचाराला कौल दिला” यावेळी बोलताना आमदार रईस शेख म्हणाले की, “भिवंडीच्या जनतेने सर्वधर्मसमभाव आणि सेक्युलर विचारधारेला विजयी केले आहे. आता आमची जबाबदारी वाढली असून, शहरातील सर्व समाजाला न्याय देण्यासाठी आम्ही कटिबद्ध आहोत. भाजपचा दावा निराधार असून महापालिकेत आमचेच सरकार येईल.”

भिवंडी निजामपूर पक्षीय बलाबल

काँग्रेस 30
भाजप 22
राष्ट्रवादी (शरद पवार) 12
शिवसेना (शिंदे गट) 12
समाजवादी पक्ष 06
कोणार्क विकास आघाडी 04
भिवंडी विकास आघाडी 03
अपक्ष 01

एकूण जागा 90