Bakara Eid 2025 : अब्राहमच्या बलिदानाची आठवण म्हणून साजरी केली जाते ईद-उल-अजहा
मुंबई | ईद-उल-अजहा, जी ‘बकरी ईद’ या नावाने प्रसिद्ध आहे, हा मुस्लिम धर्मातील अत्यंत महत्त्वाचा सण मानला जातो. प्रत्येक वर्षी धुल हज्जा या इस्लामिक महिन्याच्या दहाव्या दिवशी हा सण साजरा केला जातो. Bakara Eid 2025 या दिवशी इस्लाम धर्मीय कुरबानी म्हणजेच बलिदान देतात आणि त्यातून त्याग, समर्पण आणि अल्लाहवरील अढळ श्रद्धेचे प्रतीक म्हणून हा दिवस ओळखला जातो.
कुरबानी मागे असलेली श्रद्धा आणि बकरीची निवड यामागे धार्मिक, ऐतिहासिक कारण
बकरी ईदचा इतिहास हजरत इब्राहिम (अब्राहम) यांच्या कथेशी संबंधित आहे. धार्मिक कथेनुसार, अल्लाहने इब्राहिम यांची परीक्षा घेण्यासाठी त्यांना स्वतःच्या पुत्राची कुरबानी देण्यास सांगितले. अल्लाहच्या आदेशाप्रती अढळ निष्ठा ठेवून इब्राहिम हे आपल्या पुत्र इश्माईलला कुरबानीसाठी तयार झाले. मात्र शेवटी, अल्लाहने त्यांच्या निष्ठेची परीक्षा घेतली असून एका मेंढ्याच्या रूपात फरिश्ता पाठवून इश्माईलचा जीव वाचवला आणि त्या ऐवजी मेंढा कुरबानी दिला गेला. त्याच्या आठवणीप्रित्यर्थ ही परंपरा सुरू झाली.
बकरीची कुरबानी का?
‘बकरी ईद’ असे नाव पडले यामागेही धार्मिक आणि व्यवहारिक कारणे आहेत. कुरबानीसाठी बकरी, मेंढी, गाय, उंट यांचाही उपयोग केला जातो, मात्र भारतात विशेषतः बकरीची कुरबानी प्रचलित आहे कारण ती सहज उपलब्ध आणि आर्थिक दृष्टिकोनातून सर्वसामान्यांकरिता परवडणारी असते.
या कुरबानीच्या गोष्टीतून शिकवण मिळते की, ईश्वराच्या आज्ञेसमोर अहंकार किंवा मोह याला स्थान नसावे. कुरबानी म्हणजे केवळ प्राणी मारणे नसून, आपल्या अंतःकरणातील स्वार्थ, लोभ, अहंकार यांचा त्याग देखील आवश्यक आहे.
सामाजिक बांधिलकी आणि मदतीचा संदेश
कुरबानीनंतर मांसाचे तीन भाग केले जातात— एक भाग स्वतःसाठी, दुसरा नातेवाईकांसाठी आणि तिसरा गरजू, गरीबांसाठी दिला जातो. यामुळे समाजात समता, मदतभावना आणि एकोप्याचे मूल्य अधोरेखित होते. या सणाच्या निमित्ताने मुस्लिम समाजात एकात्मता, त्याग व सेवाभावाचे अधिष्ठान घालण्यात येते.
