Maharashtra Budget Session 2026 : महाराष्ट्र विधिमंडळाचे अर्थसंकल्पीय अधिवेशन आजपासून; अजित पवारांच्या अपघाती निधनानंतर सत्ताधारी आणि विरोधक आमनेसामने
•सुनेत्रा पवार उपमुख्यमंत्री म्हणून पहिल्यांदाच सभागृहात | चहापानावर बहिष्कार टाकत महाविकास आघाडी आक्रमक
मुंबई :- महाराष्ट्र विधिमंडळाच्या बहुप्रतीक्षित अर्थसंकल्पीय अधिवेशनाला आजपासून वादळी वातावरणात सुरुवात होत आहे. राज्याचे माजी उपमुख्यमंत्री अजित पवार यांच्या विमान अपघातातील धक्कादायक निधनानंतरचे हे पहिलेच अधिवेशन असल्याने राजकीय वर्तुळात मोठी संवेदनशीलता पाहायला मिळत आहे. दुसरीकडे, अजित पवारांच्या निधनानंतर उपमुख्यमंत्री पदाची सूत्रे स्वीकारलेल्या सुनेत्रा पवार यांच्या कार्यकाळातील हे पहिलेच अधिवेशन असल्याने, सभागृहात त्या कशा प्रकारे सरकारची बाजू मांडतात याकडे सर्वांचे लक्ष लागले आहे.
अधिवेशनाच्या पूर्वसंध्येला मुख्यमंत्री देवेंद्र फडणवीस यांनी आयोजित केलेल्या पारंपारिक चहापान कार्यक्रमावर महाविकास आघाडीने बहिष्कार टाकला आहे. अजित पवार अपघात प्रकरणातील संशयास्पद बाबी, राज्यातील कायदा व सुव्यवस्था आणि शेतकऱ्यांचे प्रश्न यांवरून विरोधकांनी सरकारला घेरण्याची रणनीती आखली आहे. त्यामुळे हे अधिवेशन अत्यंत संघर्षाचे आणि वादळी ठरण्याची चिन्हे आहेत.
अधिवेशनाचे आजचे वेळापत्रक:
अधिवेशनाची सुरुवात सकाळी 11 वाजता राज्यपालांच्या अभिभाषणाने होईल. विधानमंडळाच्या दोन्ही सभागृहांची (विधानसभा आणि विधानपरिषद) संयुक्त बैठक पार पडणार असून राज्यपाल सरकारची आगामी धोरणे मांडतील. अभिभाषण संपल्यानंतर 20 मिनिटांची विश्रांती दिली जाईल आणि त्यानंतर विधानसभेच्या प्रत्यक्ष कामकाजाला सुरुवात होईल.
