Goa News : ‘गोवा सरकार’ मदतीला धावले! पंजाब आणि छत्तीसगडच्या पूरग्रस्तांसाठी मदतीचे ट्रक रवाना
Goa CM Pramod Sawant Send relief For Punjab : मुख्यमंत्री डॉ. प्रमोद सावंत यांचा माणुसकीचा संदेश; 5 कोटी रुपयांची आर्थिक मदतही जाहीर
पणजी :- नैसर्गिक आपत्तीचा सामना करत असलेल्या पंजाब आणि छत्तीसगडच्या पूरग्रस्त नागरिकांसाठी गोवा सरकारने मदतीचा हात पुढे केला आहे. मुख्यमंत्री डॉ. प्रमोद सावंत यांनी आज पणजी येथील सचिवालयातून आवश्यक मदतीचे साहित्य भरलेले दोन ट्रक रवाना केले. यासोबतच, 5 कोटी रुपयांची आर्थिक मदतही या दोन्ही राज्यांसाठी आधीच पाठवण्यात आली आहे.
“नैसर्गिक आपत्तीच्या वेळी गरजूंना मदतीचा हात देणे हे आपले कर्तव्य आहे. गोवा सरकार आणि गोव्याची जनता पंजाब व छत्तीसगडमधील आपल्या बांधवांच्या दु:खात त्यांच्यासोबत आहे,” असे प्रतिपादन मुख्यमंत्री डॉ. प्रमोद सावंत यांनी यावेळी बोलताना केले.
अन्नधान्य, कपडे आणि जीवनावश्यक वस्तूंचा साठा घेऊन दोन ट्रक थेट पूरग्रस्त भागांसाठी निघाले
या दोन ट्रकमध्ये कपडे, धान्य आणि इतर जीवनावश्यक वस्तू आहेत, ज्या स्थानिक प्रशासनाकडून मिळालेल्या यादीनुसार काळजीपूर्वक भरण्यात आल्या आहेत. ही मदत तातडीने गरजूंपर्यंत पोहोचेल याची खात्री गोवा सरकार करत आहे. या मदतकार्यामुळे एका राज्याने दुसऱ्या राज्याला संकटाच्या वेळी मदत करून राष्ट्रीय एकजुटीचा एक उत्तम आदर्श घालून दिला आहे.
या वेळी भाजप प्रदेशाध्यक्ष दामू नाईक, पर्यटन मंत्री रोहन खंवटे, म्हापसा आमदार जोशुआ पीटर डिसुझा आणि इतर अधिकारी उपस्थित होते. गोवा सरकारने दाखवलेल्या या संवेदनशीलतेचे सर्वत्र कौतुक होत आहे.
