•ताफ्यासह मुंबईकडे प्रयाण, पक्षात स्वागताची तयारी; मात्र बावनकुळे, चव्हाण अनभिज्ञ!
मुंबई | ठाकरे गटाचे ज्येष्ठ नेते सुधाकर बडगुजर आज दुपारी अधिकृतरित्या भाजपमध्ये प्रवेश करणार आहेत, मात्र या प्रवेशावरच पक्षांतर्गत संभ्रम आणि नाराजीचे वादळ उठले आहे. सकाळी ताफ्यासह मुंबईकडे निघालेल्या बडगुजर यांनी भाजपकडून प्रवेशासाठी वेळ निश्चित केल्याचा दावा केला असला, तरी भाजप प्रदेशाध्यक्ष चंद्रशेखर बावनकुळे आणि कार्याध्यक्ष रवींद्र चव्हाण यांनी “याची माहिती नाही” असे वक्तव्य केल्याने गोंधळाची स्थिती निर्माण झाली आहे.
दुपारी 3 वाजता मुंबईतील पक्ष कार्यालयात प्रवेशाचा कार्यक्रम निश्चित करण्यात आला आहे. केंद्रीय मंत्री नारायण राणे, आशिष शेलार आणि राधाकृष्ण विखे पाटील यांच्यासह अनेक दिग्गज नेते उपस्थित राहण्याची शक्यता आहे. मिळालेल्या माहितीनुसार बडगुजर यांना स्थानिक स्वराज्य संस्थांच्या निवडणुकीसंदर्भात विशेष जबाबदारी दिली जाणार आहे.
नाशिक भाजपमध्ये नाराजीचा सूर; स्थानिक नेत्यांकडून खुलेपणाने विरोध
दरम्यान, नाशिकमधील भाजप कार्यकर्ते आणि माजी पदाधिकाऱ्यांमध्ये अस्वस्थता निर्माण झाली आहे. “बाहेरून आलेल्यांना झटणाऱ्यांवर मिळणारी पावती अन्यायकारक आहे” अशी भावना व्यक्त करत अनेकांनी पक्षनेतृत्वाकडे थेट नाराजी व्यक्त केली आहे. “निष्ठावान कार्यकर्त्यांच्या मेहनतीकडे दुर्लक्ष होत आहे,” अशीही टीका झाली आहे.
या संदर्भात सुधाकर बडगुजर यांनी माध्यमांशी बोलताना स्पष्ट केलं की, “मी कोणाशी स्पर्धा करत नाही, सहकार्य घेऊनच काम करणार आहे. सुरुवातीला शंका असू शकतात, पण ती दूर करण्याचा प्रयत्न करेन.”
